మరో ప్రాజెక్టుకి ఓకే చెప్పిన యంగ్ హీరో!

ఆది సాయికుమార్ కెరియర్ తొలినాళ్లలో వరుస విజయాలను అందుకున్నాడు. అయితే కొంతకాలంగా ఆయనకి సరైన హిట్ పడలేదు. దాంతో ఆయన సరైన హిట్ కోసం వెయిట్ చేస్తూనే, వచ్చిన అవకాశాలను అందుకుంటూ వెళుతున్నాడు. ప్రస్తుతం గట్టి పోటీ ఉన్నప్పటికీ, తట్టుకుని నిలబడుతున్నాడు. తాజాగా ఆయన మరో సినిమాను చేయడానికి గ్రీన్ సిగ్నల్ ఇచ్చాడు. విజన్ సినిమాస్ బ్యానర్ పై నిర్మితమవుతున్న ఈ సినిమాకి, కల్యాణ్ జీ గోగణ దర్శకత్వం వహించనున్నాడు. ఈ నేపథ్యంలో ఈ సినిమాను గురించి దర్శకుడు మాట్లాడాడు.

"ఈ కథ చాలా కొత్తగా ఉంటుంది .. ఆదిసాయికుమార్ అయితే కరెక్టుగా సెట్ అవుతాడని భావించి ఆయనకు కథను వినిపించాను. కథ వినగానే ఆయన ఎంతమాత్రం ఆలోచన చేయకుండా అంగీకరించాడు. ఈ సినిమా ఆయన కెరియర్ కి తప్పకుండా హెల్ప్ అవుతుందని భావిస్తున్నాను. ఇక ఈ సినిమాలో సునీల్ ఒక కీలకమైన పాత్రను పోషించనున్నాడు. అడగ్గానే ఆయన ఒప్పుకోవడం మాకు ఎంతో సంతోషాన్ని కలిగించింది. త్వరలోనే షూటింగుకు వెళ్లనున్నాం. సాయికార్తీక్ సంగీతం ఈ సినిమాకి ప్రత్యేక ఆకర్షణగా నిలుస్తుంది" అని చెప్పుకొచ్చాడు.