Egypt: ఈజిప్టులో రైలు ప్రమాదం.. 32 మంది మృతి
- మరో 66 మందికి తీవ్ర గాయాలు
- దక్షిణ కైరో సమీపంలోని షోహాగ్‌లో దుర్ఘటన
- పాసింజర్‌ రైళ్లు పరస్పరం ఢీకొట్టుకోవడంతో ప్రమాదం
ఈజిప్ట్‌లో ఘోర రైలు ప్రమాదం జరిగింది. దక్షిణ కైరోకి సమీపంలో రెండు పాసింజర్‌ రైళ్లు ఒకదానికొకటి ఢీకొట్టుకోవడంతో 32 మంది మృతి చెందారు. ఈ ప్రమాదంలో 66 మందికి గాయాలైనట్టు ఆ దేశ ఆరోగ్యశాఖ అధికారులు వెల్లడించారు. క్షతగాత్రులను సమీప ఆస్పత్రికి తరలించి చికిత్స అందిస్తున్నారు.
దక్షిణ కైరోకు 460 కి.మీల దూరంలోని షోహాగ్‌లో ఈ దుర్ఘటన చోటుచేసుకుంది. ఈ ఘటనలో నాలుగు బోగీలు బోల్తా పడటంతో ఈ ప్రమాదం జరిగినట్టు సమాచారం. ఘటనా స్థలానికి 36 అంబులెన్స్‌లు చేరుకున్నట్టు ఆరోగ్య మంత్రిత్వశాఖ అధికార ప్రతినిధి డాక్టర్‌ ఖలీద్‌ మెజాహెద్‌ వెల్లడించారు. సహాయక చర్యలు కొనసాగుతున్నట్టు చెప్పారు.
