Hyderabad: హైదరాబాద్ పరిధిలో ఇక రాత్రి 9.30 తరువాతే డ్రంకెన్ డ్రైవ్ పరీక్షలు!
- ప్రస్తుతం రాత్రి 7 గంటలకే డ్రంకెన్ డ్రైవ్
- పలు ప్రాంతాల్లో నిలిచిపోతున్న ట్రాఫిక్
- ఫిర్యాదులు రావడంతో స్పందించిన ఉన్నతాధికారులు
ఇటీవలి కాలంలో మందు కొట్టి వాహనాలను నడుపుతూ పట్టుబడుతున్న వారి సంఖ్య పెరిగిపోతుండటంతో భాగ్యనగరి పరిధిలో సాయంత్రం నుంచే డ్రంకెన్ డ్రైవ్ తనిఖీలకు పోలీసులు దిగుతున్నారు. దీంతో తనిఖీలు చేస్తున్న అన్ని ప్రాంతాల్లో ట్రాఫిక్ కు తీవ్ర అంతరాయాలు ఏర్పడుతున్నాయి. ఈ విషయంలో తాము పడుతున్న ఇబ్బందుల గురించి తెలుపుతూ, వాహనదారుల నుంచి ఫిర్యాదులు వెల్లువెత్తడం, పలు పత్రికల్లో ట్రాఫిక్ జామ్ కు సంబంధించిన వార్తలు రావడంతో ఉన్నతాధికారులు స్పందించారు.
రాత్రి 9 గంటల్లోపు డ్రంకెన్ డ్రైవ్ పరీక్షలు నిర్వహించేందుకు సరైన సమయం కాదని భావించిన ట్రాఫిక్ విభాగం, 7 తరువాత ఎక్కడెక్కడ డ్రైవ్ లను జరిపారన్న విషయాన్ని ఆరా తీశారు. కొంతమంది ట్రాఫిక్ పోలీసులు అత్యుత్సాహంతో ఈ పని చేసి ఉంటారని భావిస్తూ, రాత్రి 9.30 గంటల తరువాతనే పరీక్షలు చేయాలని గురువారం నాడు ఆదేశాలు జారీ చేశారు. మందుబాబులు కూడా 10 గంటల తరువాతనే రోడ్లపైకి వస్తారన్న అంచనాతోనే, అన్ని పోలీసు స్టేషన్ల పరిధిలో రాత్రి 9.30 తరువాతే డ్రంకెన్ డ్రైవ్ పరీక్షలను నిర్వహించాలని ఆదేశించామని ఉన్నతాధికార వర్గాలు వెల్లడించాయి.
