Pavitra: శ్రీలంక మంత్రిని కరోనా నుంచి కాపాడలేకపోయిన మ్యాజిక్ సిరప్!
- శ్రీలంక ఆరోగ్య మంత్రిగా ఉన్న పవిత్ర
- నెల క్రితం మ్యాజిక్ సిరప్ తీసుకున్న పవిత్ర
- ఆపై సోకిన కరోనా మహమ్మారి
ఆమె పేరు పవిత్ర వినియరాచ్చి... శ్రీలంకలో ఆరోగ్య శాఖ బాధ్యతలను పర్యవేక్షిస్తున్న మంత్రి. ఇటీవల ఆమె కరోనా రాకుండా వ్యాధి నిరోధక శక్తిని పెంపొందిస్తుందని చెబుతూ, ఓ మ్యాజిక్ సిరప్ (మహిమగల పానకం) తీసుకున్నారు. ఈ విషయం పత్రికలు, టీవీల్లో పెద్ద ఎత్తున రావడంతో ప్రజలు దీని కోసం ఎగబడ్డారు. మహిమగల సిరప్ గా దీని తయారీదారులు చెప్పుకోవడంతో దీనికి ఎనలేని డిమాండ్ వచ్చింది. ఈ ఘటన దాదాపు నెల రోజుల క్రితం జరిగింది.
అంతవరకూ బాగానే ఉంది. తాజాగా, పవిత్ర అనారోగ్యం బారిన పడటంతో, అధికారులు కరోనా పరీక్షలు చేశారు. ఈ పరీక్షల్లో ఆమెకు కొవిడ్ మహమ్మారి సోకినట్టుగా నిర్ధారణ అయింది. ఆ వెంటనే ఈమెపై సామాజిక మాధ్యమాల్లో ట్రోలింగ్ మొదలైంది. మీరు తాగిన మ్యాజిక్ సిరప్ పని చేయలేనట్టుంది? అంటూ సెటైర్లు మొదలయ్యాయి. ప్రజల్లో టీకాపై అవగాహన పెంచాల్సిన బాధ్యతల్లో ఉన్న వ్యక్తి ఇలా చేయడం ఏంటంటూ ప్రపంచ వ్యాప్తంగానూ విమర్శలు వస్తున్నాయి.
ఈ విషయంలో స్పందించని పవిత్ర, తనకు కరోనా సోకినట్టు అంగీకరిస్తూ, ఇటీవలి కాలంలో తనను కలిసిన వారంతా సెల్ఫ్ క్వారంటైన్ లోకి వెళ్లాలని, తన ఆరోగ్యం బాగానే ఉందని ఓ ప్రకటన విడుదల చేశారు. ఏది ఏమైనా ఆరోగ్య శాఖకు మంత్రిగా ఉండి, మూఢనమ్మకాలతో ఇటువంటి మ్యాజిక్ సిరప్ లను ప్రోత్సహించడం ఏమిటన్న విమర్శలు తలెత్తుతున్నాయి.
