Ramcharan: ప్రాణాలు కోల్పోయిన అభిమానుల కుటుంబాలకు ఆర్థికసాయం ప్రకటించిన రాంచరణ్
- ఫ్లెక్సీలు కడుతూ ముగ్గురు మెగా అభిమానుల మృతి
- ఈ వార్త కలచి వేసిందన్న రాంచరణ్
- ప్రాణాల కంటే ఏదీ ముఖ్యం కాదని వ్యాఖ్య
జనసేన అధినేత పవన్ కల్యాణ్ జన్మదినం సందర్భంగా ఫ్లెక్సీలు కడుతూ చిత్తూరు జిల్లాలో ముగ్గురు అభిమానులు విద్యుదాఘాతంతో ప్రాణాలు కోల్పోయిన సంగతి తెలిసిందే. ఈ ఘటనపై సినీహీరో రాంచరణ్ దిగ్భ్రాంతిని వ్యక్తం చేశాడు. ట్విట్టర్ ద్వారా ఆయన స్పందిస్తూ ముగ్గురు అభిమానులు ప్రాణాలు కోల్పోయారనే వార్త కలచి వేసిందని చెప్పాడు.
మీ ప్రాణాల కంటే ఏదీ ముఖ్యమైనది కాదని అన్నాడు. అభిమానులంతా ఈ విషయాన్ని గుర్తుంచుకోవాలని... మీ కుటుంబ సభ్యులకు ఆవేదన కలిగించవద్దని కోరాడు. దుర్ఘటనలో ప్రాణాలు కోల్పోయిన వారి ఆత్మలకు శాంతి చేకూరాలని ప్రార్థిస్తున్నట్టు చెప్పాడు. వారి కుటుంబ సభ్యులకు సానుభూతిని తెలియజేశారు.
ఈ బాధాకర సమయంలో వారి కుటుంబాలకు అండగా నిలవడం తప్ప మనం మరేమీ చేయలేమని... వారి లేని లోటును మనం పూడ్చలేమని రాంచరణ్ అన్నాడు. ముగ్గురి కుటుంబాలకు రూ. 2.5 లక్షల చొప్పున సాయం చేస్తున్నట్టు ప్రకటించాడు.
