Kalpika Ganesh: బిగ్ బాస్ లో పాల్గొనడంపై క్లారిటీ ఇచ్చిన సినీనటి కల్పిక గణేశ్!
- త్వరలోనే ప్రారంభం కానున్న బిగ్ బాస్ 4
- కల్పిక గణేశ్ పాల్గొనబోతోందంటూ వార్తలు
- ఎప్పటికీ ఈ షోలో పాల్గొనని స్పష్టం చేసిన కల్పిక
తెలుగు బిగ్ బాస్ సీజన్ 4 త్వరలోనే ప్రారంభం కానుంది. ప్రేక్షకులు కూడా ఈ షో కోసం అప్పుడే ఎదురు చూడటం ప్రారంభించారు. హీరో నాగార్జున హోస్ట్ చేయనున్న ఈ కార్యక్రమం గురించి మీడియాలో పలు ఆసక్తికర కథనాలు వస్తున్నాయి. పలానా సెలబ్రిటీలు ఈ షోలో పాల్గొంటున్నారంటూ కొన్ని పేర్లు కూడా బయటకు వస్తున్నాయి. అయితే, బిగ్ బాస్ నిర్వాహకుల నుంచి దీనికి సంబంధించి ఇంత వరకు ఎలాంటి అధికారిక ప్రకటన వెలువడలేదు.
మరోవైపు, ఈ షోలో సినీనటి కల్పిక గణేశ్ కూడా పార్టిసిపేట్ చేస్తున్నట్టు వార్తలు వస్తున్నాయి. దీనిపై తాజాగా ఆమె స్పందిస్తూ, ఈ రియాల్టీ షోలో ఇప్పుడే కాదు, ఎప్పటికీ తనను చూడలేరని తెలిపింది. భవిష్యత్తులో కూడా ఈ షోలో తాను పాల్గొనబోనని స్పష్టం చేసింది. దీంతో, ఈ వార్తలకు ఫుల్ స్టాప్ పడినట్టైంది.
