Theatres: అన్ లాక్-3 లో సినిమా హాళ్లకు ఓకే..?
- ఆగస్టు నుంచి మూడో దశ అన్ లాక్
- స్కూళ్లు, మెట్రోలకు మరికొంతకాలం మూతే!
- కఠిన నిబంధనలతో సినిమా థియేటర్లు, జిమ్ లకు అనుమతి
కరోనా రక్కసిని కట్టడి చేసేందుకు పలు విడతలుగా విధించిన లాక్ డౌన్ ను సడలించే క్రమంలో అన్ లాక్ ప్రక్రియ అమలు చేస్తున్నారు. ఇప్పటివరకు రెండు పర్యాయాలు అన్ లాక్ పేరిట సడలింపులు ఇచ్చిన కేంద్రం మూడో విడత అన్ లాక్ పై సన్నాహాలు చేస్తోంది. బహుశా ఆగస్టు నుంచి అన్ లాక్-3 ఉంటుందని తెలుస్తోంది. అయితే, ఇప్పటికే దేశ ఆర్థిక వ్యవస్థ తీవ్ర మందగమనంలో సాగుతున్న నేపథ్యంలో సినిమా హాళ్లు, జిమ్ లతో పాటు మరికొన్నింటికి వెసులుబాట్లు ఇవ్వాలని కేంద్ర భావిస్తున్నట్టు తెలుస్తోంది.
కేంద్ర వర్గాల సమాచారం ప్రకారం... భారీ స్థాయిలో సడలింపులకు కేంద్రం కసరత్తులు చేస్తోంది. ఆగస్టు 1 నుంచి సినిమా థియేటర్ల పునఃప్రారంభం, జిమ్ లు తెరుచుకోవచ్చన్నది వీటిలో ప్రధానమైనది. అయితే, 50 శాతం సీట్లతో థియేటర్లు తెరిచేందుకు యాజమాన్యాలు సంసిద్ధత వ్యక్తం చేస్తుండగా, కేంద్రం మాత్రం 25 శాతం సీట్లకే అనుమతిస్తామని అంటోంది. అది కూడా అన్ని రకాల మార్గదర్శకాలు పాటిస్తూ, భౌతికదూరం నిబంధన కచ్చితంగా పాటించాలని స్పష్టం చేస్తోంది.
ఇక, స్కూళ్లు, మెట్రో రైళ్లు ఇప్పట్లో పునఃప్రారంభమయ్యేది కష్టమేననిపిస్తోంది. దేశవ్యాప్తంగా కరోనా పరిస్థితులు ఇప్పటికీ మెరుగపడని నేపథ్యంలో స్కూళ్లను మూసివుంచడమే మేలని కేంద్రం భావిస్తోంది. కేంద్ర మానవ వనరుల శాఖ పాఠశాలలను తిరిగి తెరిచే విషయమై రాష్ట్రాలతో సంప్రదింపులు జరుపుతోంది. విద్యార్థుల తల్లిదండ్రుల నుంచి కూడా అభిప్రాయాలు తీసుకుంటామని కేంద్ర మానవ వనరుల శాఖ మంత్రి రమేశ్ పోఖ్రియాల్ ఇటీవలే చెప్పారు. అయితే ఇప్పట్లో స్కూళ్లను తెరవడంపై విద్యార్థుల తల్లిదండ్రులు ఏమాత్రం సుముఖంగా లేరని కేంద్రం చెబుతోంది.
