Sakshi: లాక్ డౌన్ రోజుల్లో ధోనీ ఏంచేశాడో చెప్పిన సాక్షి
- లాక్ డౌన్ తో ఇంటికే పరిమితమైన ధోనీ
- పాత బైకులను అసెంబ్లింగ్ చేసినట్టు వెల్లడి
- ఓ బైకును పూర్తిగా విప్పదీసి బిగించినట్టు వివరణ
కరోనా వైరస్ ధాటికి యావత్ ప్రపంచం లాక్ డౌన్ లో కాలం గడుపుతున్న రోజుల్లో టీమిండియా దిగ్గజం మహేంద్ర సింగ్ ధోనీ కూడా ఇంటికే పరిమితమయ్యాడు. అయితే, ఈ విరామంలో ధోనీ ఏంచేశాడో అతడి అర్ధాంగి సాక్షి వెల్లడించింది. ధోనీ ప్రాతినిధ్యం వహించే ఐపీఎల్ ఫ్రాంచైజీ చెన్నై సూపర్ కింగ్స్ తో లైవ్ చాట్ సందర్భంగా సాక్షి మాట్లాడుతూ, లాక్ డౌన్ రోజుల్లో ధోనీ 7 బైకులను విప్పదీసి, మళ్లీ బిగించాడని తెలిపింది. అవి చాలా పాత బైకులని, అయితే వాటికి విడి భాగాలు తెప్పించి, పునరుద్ధరించాడని వివరించింది. వాటిని పూర్తిగా విడదీసి, కొత్త భాగాలను అమర్చాడని తెలిపింది. అయితే ఓ బైకులో ఏ పార్టు మిస్సయిందో కానీ, అది స్టార్ట్ కాలేదని, దాంతో మరుసటి రోజు ఆ బైక్ మొత్తం విప్పదీశాడని వెల్లడించింది.
