Chittoor District: వెల్డింగ్ చేస్తుండగా పేలిన సిలిండర్లు.. కుప్పంలో ఇద్దరు యువకుల మృతి
- మరో ముగ్గురికి తీవ్ర గాయాలు
- వెల్డింగ్ నిప్పు రవ్వలు సిలిండర్లపై పడడంతో పేలిన వైనం
- మెరుగైన వైద్యం కోసం క్షతగాత్రులు బెంగళూరుకు తరలింపు
చిత్తూరు జిల్లా కుప్పం మండలంలో రెండు కంప్రెషర్ సిలిండర్లు పేలిన ఘటనలో ఇద్దరు యువకులు దుర్మరణం పాలయ్యారు. మరో ముగ్గురు తీవ్రంగా గాయపడ్డారు. మండలంలోని తంబిగానిపల్లెలో ఓ వెల్డింగ్ షాపులో ఈ ఘటన చోటుచేసుకుంది. షాపు యజమాని గౌష్ బాషా, తన వద్ద పనిచేసే ఇద్దరు యువకులు అఫ్సర్ (19), ఎజాద్ (17), మంజునాథ్‌లతో కలిసి క్రేన్‌లో ఉండే రెండు కంప్రెషర్ సిలిండర్లపై వెల్డింగ్ చేస్తున్నాడు. ఈ క్రమంలో నిప్పు రవ్వలు ఎగసి, సిలిండర్లపై పడడంతో ఒక్కసారిగా భారీ శబ్దంతో అవి పేలిపోయాయి.
ఈ ఘటనలో అఫ్సర్, ఎజాద్ అక్కడికక్కడే ప్రాణాలు కోల్పోగా, గౌష్ బాషా, మంజునాథ్‌తోపాటు క్రేన్ డ్రైవర్ రఫీ అహ్మద్ తీవ్రంగా గాయపడ్డారు. వీరిని తొలుత కుప్పంలోని పీఈఎస్ ఆసుపత్రికి తరలించారు. ప్రాథమిక చికిత్స అనంతరం మరింత మెరుగైన వైద్యం కోసం బెంగళూరుకు తరలించారు.
