Lockdown: భారత్‌లో లాక్డౌన్ సడలింపులపై డబ్ల్యూహెచ్‌ఓ హెచ్చరికలు
- లాక్డౌన్ వంటి చర్యలు మాత్రమే కరోనాను కట్టడి చేస్తాయి
- భారత్‌, అమెరికా లాంటి దేశాలు ఆంక్షలు సడలిస్తే తీవ్ర పరిణామాలు
- కరోనా పూర్తిగా తగ్గుముఖం పట్టేవరకు సడలించొద్దు
- బాగా ఆలోచించుకోవాలి
పలు దేశాల్లో లాక్డౌన్ సడలింపులు ఇస్తోన్న విషయంపై స్పందించిన ప్రపంచ ఆరోగ్య సంస్థ (డబ్ల్యూహెచ్‌ఓ) ఆయా దేశాలకు పలు హెచ్చరికలు చేసింది. కరోనా విజృంభణ అధికంగా ఉన్న ప్రస్తుత పరిస్థితుల్లో సామాజిక దూరం, లాక్డౌన్ వంటి చర్యలు మాత్రమే కరోనాను కట్టడి చేస్తాయని డబ్ల్యూహెచ్‌ఓ అత్యవసర విభాగ సీనియర్‌ అధికారి డాక్టర్ మైక్ ర్యాన్ తెలిపారు.
భారత్‌తో పాటు అమెరికా లాంటి దేశాలు ఒకవేళ నిబంధనలను సడలిస్తే తీవ్ర పరిణామాలను ఎదుర్కొంటాయని హెచ్చరించారు. కరోనా పూర్తిగా తగ్గుముఖం పట్టేవరకు లాక్డౌన్ ఆంక్షలు సడలించవద్దని సూచించారు. కాగా, కరోనా వైరస్‌ను కట్టడి చేయడానికి ప్రస్తుతం పలు దేశాలు తీసుకుంటున్న చర్యలు బాగున్నాయని ప్రశంసించాయి.
ఇటువంటి సమయంలో వైరస్‌ ప్రభావం లేని ప్రాంతాల్లో నిబంధనలు ఎత్తివేయడం వల్ల మళ్లీ ప్రతికూల పరిస్థితులు ఎదురవుతాయని చెప్పారు. ఆయా దేశాల్లో లాక్డౌన్ నిబంధనల్ని ఎత్తివేసే విషయంపై బాగా ఆలోచించుకోవాలని తెలిపారు. లాక్డౌన్ సడలింపులు ఇస్తున్న చాలా దేశాల్లో కేసులు ఒక్కసారిగా పెరిగాయని తెలిపారు. ఇలాంటి పరిస్థితులు ఆఫ్రికా, మధ్య ఆసియా దేశాల్లో అధికంగా ఉన్నాయన్నారు.
