Hrithi Roshan: ముంబయి పోలీస్ ట్వీట్ పై బాలీవుడ్ హీరో హృతిక్ రోషన్ ఆసక్తికర వ్యాఖ్యలు!
- ‘ఫూల్’ పద ప్రయోగంతో ముంబయి పోలీస్ ట్వీట్
- ఆ పోస్ట్ లో వాక్యాలను జూమ్ చేసి చూస్తే ఆసక్తికర సూచన
- తీవ్రమైన సమస్యలను సైతం హాస్యం జోడించి చెప్పొచ్చా అంటూ హృతిక్ స్పందన
ఇవాళ్టి నుంచి ఏప్రిల్ నెల మొదలైంది. ‘ఏప్రిల్’ అనగానే పిల్లలు సహా పెద్దలకు గుర్తుకు వచ్చే పదం ‘ఫూల్’. ఈ నెల మొదటి రోజున.. లేనిది ఉన్నట్టుగా చెప్పి అవతలి వ్యక్తిని నమ్మించే ప్రయత్నం చేసి, ఒకవేళ ఆ వ్యక్తి నమ్మితే ‘ఏప్రిల్ ఫూల్’ అంటూ వారిని ఆట పట్టించడం పరిపాటి.
ఇదిలా ఉండగా, ప్రస్తుతం కరోనా వైరస్ వణికిస్తున్న నేపథ్యంలో ప్రజలు పాటించాల్సిన జాగ్రత్తల గురించి కేంద్ర, రాష్ట్ర ప్రభుత్వాలతో పాటు పలు శాఖలు ఏకరవు పెడుతున్నాయి. ఈ క్రమంలో ప్రజలను చైతన్య పరిచేందుకు ముంబయి పోలీస్ కూడా ఓ వినూత్న ఆలోచనతో హాస్యం పుట్టుకొచ్చే ఓ పోస్ట్ ను తన ట్విట్టర్ ఖాతా ద్వారా ఈరోజు షేర్ చేసింది.
‘మీ కోసం ఓ రహస్య సమాచారం’ అంటూ ఆ సమాచారం చూడాలంటే ‘జూమ్ ఇన్’ చేయాలంటూ ఆ పోస్ట్ లోనే చిన్న అక్షరాలతో మూడు లైన్ల మెస్సేజ్ ను ముంబయి పోలీస్ తన పోస్ట్ లో పేర్కొంది. ఆ వాక్యాలను పెద్దవి చేసి చూస్తే.. 'మరీ దగ్గరగా ఉండకండి.. ఫూల్ అవ్వకండి ..సామాజిక దూరం (సోషల్ డిస్టెన్స్) పాటించండి' అనే సందేశాన్ని హాస్యయుక్తంగా చెప్పడం కనబడుతుంది.
ఆ పోస్ట్ పై ప్రముఖ బాలీవుడ్ నటుడు హృతిక్ రోషన్ స్పందించాడు. ఈ పోస్ట్ చాలా వినూత్నంగా ఉందని, తీవ్రమైన సమస్యలను సైతం కొద్దిపాటి హాస్యం జోడించి చెప్పవచ్చన్న విషయాన్నిగుర్తు చేస్తోందని బదులిచ్చాడు.
