Umareddy: నిప్పునని చెప్పుకునే చంద్రబాబు ఎందుకు మౌనం పాటిస్తున్నారు?: వైసీపీ నేత ఉమ్మారెడ్డి
- మాజీ పీఎస్ నివాసంలో ఐటీ దాడులతో బాబుకు సంబంధం లేదా?
- బాబు, లోకేశ్ ల ఆర్థిక లావాదేవీలపై యనమల వకాల్తా
- తనపై ఆరోపణలపై చంద్రబాబు స్పందించరే?
చంద్రబాబునాయుడు మాజీ పీఎస్ నివాసంలో ఐటీ దాడులతో బాబుకు ఎటువంటి సంబంధం లేదంటూ టీడీపీ నేత యనమల రామకృష్ణుడు చేసిన వ్యాఖ్యలపై వైసీపీ నాయకుడు ఉమ్మారెడ్డి వెంకటేశ్వర్లు విమర్శలు గుప్పించారు. చంద్రబాబు, లోకేశ్ ల ఆర్థిక లావాదేవీల విషయంలో యనమల వకాల్తా తీసుకున్నారా? అని ప్రశ్నించారు.
చాలా సందర్భాల్లో తాను నిప్పునని చెప్పుకునే చంద్రబాబు తనపై ఆరోపణలు వస్తున్నా ఎందుకు మౌనం పాటిస్తున్నారు? ఆ నిప్పుకు ఇప్పుడు తుప్పు పట్టిందా? తేలు కుట్టిన దొంగలా ఉన్నారా? అన్న అభిప్రాయం ప్రజల్లో ఉందని అన్నారు. తన మాజీ పీఎస్ డొల్ల కంపెనీలు నిర్వహించిన విషయం చంద్రబాబుకు తెలియదంటే ప్రజలు నమ్ముతారా? అని ప్రశ్నించారు. ఈ మొత్తం వ్యవహారంలో తనకు సంబంధం లేకపోతే కనుక అదే విషయాన్ని చంద్రబాబు వెల్లడించాలని డిమాండ్ చేశారు.
