kphb: సినిమా ప్రదర్శన పది నిమిషాలు ఆలస్యమైందట.. కేపీహెచ్‌బీలోని థియేటర్ పై కేసు పెట్టిన ప్రేక్షకుడు!
- ఈ నెల 8న ఘటన
- తన సమయాన్ని వృథా చేశారంటూ ప్రేక్షకుడి ఫిర్యాదు
- కోర్టు అనుమతితో తాజాగా కేసు నమోదు
నిర్ణీత సమయానికి పది నిమిషాలు ఆలస్యంగా సినిమా ప్రదర్శన ప్రారంభం కావడంతో అసహనానికి గురైన ప్రేక్షకుడు పోలీసులకు ఫిర్యాదు చేశాడు. హైదరాబాద్, కేపీహెచ్‌బీ పోలీసుల కథనం ప్రకారం.. ఈ నెల 8న స్థానిక మంజీరా మాల్‌లోని మూడో అంతస్తులో ఉన్న సినీ పోలిస్‌లో 'చాణక్య' సినిమాను ప్రదర్శిస్తున్నారు.
ఇక సినిమా ప్రదర్శన 4:40 గంటలకు ప్రారంభం కావాల్సి ఉండగా, పది నిమిషాలు ఆలస్యంగా ప్రదర్శించారు. ఆ పది నిమిషాలు వాణిజ్య ప్రకటనలు వేసి విసుగు తెప్పించడంతోపాటు, తన సమయాన్ని వృథా చేశారని, నియమ నిబంధనలు ఉల్లంఘించారని ఆరోపిస్తూ ఓ ప్రేక్షకుడు పోలీసులకు ఫిర్యాదు చేశాడు. ఈ ఫిర్యాదుపై మంగళవారం కోర్టు నుంచి అనుమతి వచ్చింది. దీంతో తాజాగా కేసు నమోదు చేసినట్టు సీఐ లక్ష్మీనారాయణ తెలిపారు.
