Chiranjeevi: మేమంత అడగలేదు.. చిరంజీవి అబద్ధం చెబుతున్నారు: ఉయ్యాలవాడ కుటుంబీకులు
- ఒక్కో కుటుంబానికి రూ. 2 కోట్లు అడుగుతున్నారన్న చిరంజీవి
- ఒక్కో కుటుంబానికి రూ. 15 లక్షలు మాత్రమే అడిగాం
- సినిమాపై వేసిన కేసులను వెనక్కి తీసుకుంటున్నాం
చిరంజీవి హీరోగా ఎంతో ప్రతిష్ఠాత్మకంగా తెరకెక్కిన 'సైరా నరసింహారెడ్డి' చిత్రం అక్టోబర్ 2న విడుదల కాబోతోంది. మరోవైపు, ఈ చిత్రం విడుదలపై గత కొన్ని రోజులుగా వివాదాలు నెలకొన్నాయి. సినిమా విడుదలను అడ్డుకుంటామంటూ ఉయ్యాలవాడ నరసింహారెడ్డి కుటుంబీకులు ఆందోళన చేస్తున్న సంగతి తెలిసిందే. సినిమా చిత్రీకరణ సమయంలో తమకు ఇచ్చిన హామీలను చిరంజీవి, రామ్ చరణ్ లు నిలబెట్టుకోలేదని వారు ఆరోపిస్తున్నారు. ఈ నేపథ్యంలో ఇటీవల ఓ ఇంటర్వ్యూలో చిరంజీవి మాట్లాడుతూ నరసింహారెడ్డి వారసులమంటూ 23 కుటుంబాల వారు ఒక్కొక్క కుటుంబానికి రూ. 2 కోట్లు చొప్పున డిమాండ్ చేస్తున్నారని... దాదాపు రూ. 50 కోట్లు ఎక్కడ నుంచి తీసుకురావాలని ప్రశ్నించారు.
ఈ నేపథ్యంలో చిరంజీవి వ్యాఖ్యలపై ఉయ్యాలవాడ కుటుంబీకులు స్పందిస్తూ... చిరంజీవి అబద్ధాలు చెబుతున్నారని అన్నారు. చరణ్ చెప్పినట్టుగా తాము ఒక్కో కుటుంబానికి రూ. 15 లక్షలు అడిగామని తెలిపారు. సినిమాకు సంబంధించి తాము వేసిన కేసులను వెనక్కి తీసుకుంటున్నామని వెల్లడించారు.
