Srisailam: శ్రీశైలం దేవస్థానం దుకాణాల వేలం రద్దుకు మంత్రి వెల్లంపల్లి ఆదేశం
- దేవాదాయ శాఖ కమిషనర్ కు మంత్రి ఆదేశాలు
- వేలం పాట రద్దుకు తగు చర్యలు తక్షణమే చేపట్టాలి
- పూర్తి వివరాలు అందగానే తదుపరి చర్యలు చేపడతాం
శ్రీశైల దేవస్థానం, లలితాంబిక వాణిజ్య సముదాయంలోని దుకాణాలకు ఇటీవల నిర్వహించిన వేలంపాటపై ఆరోపణలు తలెత్తిన నేపథ్యంలో దీనిపై ఏపీ ప్రభుత్వం దృష్టి సారించింది. ఈ మేరకు ఏపీ దేవాదాయ శాఖ మంత్రి వెల్లంపల్లి శ్రీనివాస్ కార్యాలయం నుంచి ఓ ప్రకటన విడుదల చేశారు. దుకాణాల వేలం పాట రద్దుకు తగిన చర్యలు తక్షణమే చేపట్టాలని దేవాదాయ శాఖ కమిషనర్ కు మంత్రి ఆదేశాలు జారీ చేశారు. ఈ అంశంపై పూర్తి వివరాలు అందిన అనంతరం తదుపరి చర్యలు చేపడతామని పేర్కొన్నారు. అవినీతి లేని పారదర్శక పరిపాలనే ప్రభుత్వ లక్ష్యం అని, దేవాలయాలలో రాజకీయాలకు తావులేదని స్పష్టం చేశారు. శ్రీశైల దేవస్థానం పరిరక్షణ కోసం ప్రభుత్వం చిత్తశుద్ధితో ఉందని తెలిపారు.
