Assom: కుమార్తెపై అత్యాచారం చేసిన తండ్రికి యావజ్జీవ జైలు శిక్ష!
- కన్నబిడ్డపై రెండేళ్లు దాష్టికం
- ఇంట్లోంచి పారిపోయిన పాప
- రెండున్నరేళ్ల తరువాత తీర్పు
కంటికి రెప్పలా కాపాడుకోవాల్సిన కన్నబిడ్డపై రెండేళ్లపాటు అత్యాచారం చేసిన దుర్మార్గుడికి యావజ్జీవ జైలు శిక్ష పడింది. ఇంతటి మానవ మృగం సభ్య సమాజంలో నివసించేందుకు అర్హుడు కాదని, అతనికి జైలే సరైనదని ఈ సందర్భంగా న్యాయమూర్తి వ్యాఖ్యానించారు. వివరాల్లోకి వెళితే, ఈ ఘటన అసోంలోని నౌగావ్ ప్రాంతంలో జరిగింది. భార్య చనిపోవడంతో ఒంటరిగా తొమ్మిది సంవత్సరాల బిడ్డతో ఉంటున్న ఓ తండ్రి, ఆమెపై అత్యాచారానికి దిగాడు. పదేపదే దారుణంగా ప్రవర్తించాడు.
తండ్రి చేష్టలను భరించలేకపోయిన పాప, 2017లో ఇంట్లోంచి పారిపోయింది. సమీప ప్రభుత్వాసుపత్రి నర్సులు చేరదీయడంతో, తాను అనుభవిస్తున్న బాధను చెప్పి బావురుమంది. దీంతో ఆ నర్సులు పాపకు రక్షణ కల్పించి, పోలీసులకు ఫిర్యాదు చేయించారు. కేసు నమోదు చేసిన పోలీసులు, అతన్ని అరెస్ట్ చేసి, కోర్టులో ప్రవేశపెట్టి, చార్జ్ షీట్ దాఖలు చేశారు. కేసు విచారణ దాదాపు రెండున్నరేళ్లు సాగగా, తాజాగా తీర్పు వెలువడింది.
