suddala ashok teja: వీడికి ఏ పనీ చేతకాదు .. ఎలా బతుకుతాడోనని నా గురించి మా నాన్న బాధపడుతూ ఉండేవాడు: సుద్దాల అశోక్ తేజ
- మా నాన్న ఆందళన నా గురించే
- నేను అదృష్టవంతుడినని అమ్మ చెప్పేది
- నా ఎదుగుదల మా అమ్మ చూసింది
తాజా ఇంటర్వ్యూలో సుద్దాల అశోక్ తేజ మాట్లాడుతూ, తన తల్లిదండ్రులను గురించి ప్రస్తావించారు. "మా నాన్న నా గురించి ఎప్పుడూ బాధపడుతూ ఉండేవాడు. 'వీడికి ఏ పనీరాదు .. ఎలా బతుకుతాడో ఏమో' అని చెప్పేసి, అది నేర్చుకో .. ఇది నేర్చుకో అనేవాడు. ఆ మాటలను నేను పెద్దగా పట్టించుకునేవాడిని కాదు.
మా అమ్మ మాత్రం 'వాడికి ఏ పనీ రాదని అనకండి .. రేప్పొద్దున వాడు అద్భుతాలు చేస్తాడు. వాడు బతకడమే కాకుండా నలుగురిని బతికిస్తాడు .. వాడు చాలా అదృష్టవంతుడు" అని మా అమ్మ చెప్పేది. ఆ తరువాత కాలంలో నేను గేయరచయితగా ఎదిగాను .. ఓ ఇల్లు కట్టుకున్నాను .. కారు కొనుక్కున్నాను. ఢిల్లీలో రాష్ట్రపతి చేతుల మీదుగా అవార్డు అందుకున్నాను. ఇవన్నీ మా అమ్మ చూసిందిగానీ .. మా నాన్నే చూడలేకపోయాడు. నా ఇంటర్ పూర్తయిన తరువాత ఆయన చనిపోయాడు" అని చెప్పుకొచ్చారు.
