rape victim: నా పరిస్థితి అత్యాచార బాధితురాలిలా తయారైంది: కర్ణాటక స్పీకర్ వివాదాస్పద వ్యాఖ్యలు
- వివాదాస్పద ఆడియో టేప్‌ను బయటపెట్టిన సీఎం
- సభలో వాడివేడి చర్చ
- తన పరిస్థితి దారుణంగా తయారైందని వాపోయిన స్పీకర్
కర్ణాటక శాసనసభాపతి కేఆర్ రమేశ్ కుమార్ చిక్కుల్లో పడ్డారు. తన పరిస్థితి అత్యాచార బాధితురాలిలా తయారైందంటూ ఆయన చేసిన వ్యాఖ్యలు కలకలం సృష్టించాయి. 50 కోట్ల రూపాయలతో తనను ప్రలోభపెట్టాలని ప్రయత్నించారన్న వివాదాస్పద ఆడియో టేప్‌పై స్పీకర్ మాట్లాడుతూ.. తన పరిస్థితి రేప్ బాధితురాలిలా తయారైందని వాపోయారు. ఆమె ఒకసారి అత్యాచారానికి గురైతే.. కోర్టులో నిందితుడి తరపు న్యాయవాది రేప్ ఎలా జరిగింది? ఎంత సేపు జరిగింది? అని గుచ్చిగుచ్చి ప్రశ్నించినట్టుగా ఉందని పేర్కొన్నారు.
కర్ణాటక ముఖ్యమంత్రి హెచ్‌డీ కుమారస్వామి ఈ ఆడియో క్లిప్‌ను విడుదల చేశారు. బీజేపీ రాష్ట్ర అధ్యక్షుడు బీఎస్ యడ్యూరప్ప-జేడీఎస్ ఎమ్మెల్యే నాగన్‌గౌడ కంద్‌కూర్ కుమారుడు శరణగౌడ మధ్య జరిగిన సంభాషణ ఇందులో రికార్డు అయింది. మంగళవారం మొత్తం అసెంబ్లీలో ఇదే విషయమై వాడివేడిగా చర్చ జరిగింది.
ఈ నేపథ్యంలో స్పీకర్ మాట్లాడుతూ తన పరిస్థితి రేప్ బాధితురాలిలా తయారైందన్నారు. ఎవరో ఏదో చేస్తే దానికి తనను రోడ్డు మీదికి తీసుకురావడం ఏంటని ఆవేదన వ్యక్తం చేశారు.
