shivakarthikeyan: 'సీమరాజా'లో సిమ్రన్ విలనిజం చూసితీరవలసిందే: నిర్మాత సాయికృష్ణ
- తమిళంలో హిట్ కొట్టిన 'సీమరాజా'
- అదే పేరుతో తెలుగులోకి
- ఈ నెల 8వ తేదీన విడుదల
ఇటీవల తమిళంలో విడుదలైన 'సీమరాజా' అక్కడ భారీ వసూళ్లను సాధించింది. శివకార్తికేయన్ సరసన సమంత .. కీర్తి సురేశ్ నాయికలుగా నటించగా,లేడీ విలన్ గా సిమ్రన్ నటించింది. శివకార్తికేయన్ కెరియర్లోనే చెప్పుకోదగినదిగా నిలిచిన ఈ సినిమాను, అదే టైటిల్ తో తెలుగులో ఈ నెల 8వ తేదీన విడుదల చేయనున్నారు. తెలుగు ప్రేక్షకుల ముందుకు ఈ సినిమాను నిర్మాత సాయికృష్ణ తీసుకురానున్నారు.
ఈ సందర్భంగా ఆయన మాట్లాడుతూ .." శివకార్తికేయన్ .. సమంత .. కీర్తి సురేశ్ పాత్రలు సినిమాకి ప్రధాన బలంగా నిలుస్తాయి. ఇక సిమ్రన్ పండించే విలనిజం తెరపై చూసితీరవలసిందే. 'ఒరేయ్ నేను చీరకట్టిన మగాడినిరా' అంటూ ఆమె డైలాగ్ వుంటుందంటే ఆ విలనిజం ఏ స్థాయిలో వుంటుందో అర్థం చేసుకోవచ్చు. ఈ సినిమాకి సిమ్రన్ పాత్ర హైలైట్ గా నిలుస్తుంది. ఎక్కడా తమిళ ఫ్లేవర్ కనిపించకుండా జాగ్రత్తలు తీసుకున్నాము. తెలుగు రాష్ట్రాల్లో 400 థియేటర్స్ లో విడుదల చేస్తున్నాము. తప్పకుండా హిట్ అవుతుందనే నమ్మకం వుంది" అంటూ చెప్పుకొచ్చారు. 