Tollywood: ఫోర్బ్స్ ‘30 అండర్ 30’లో విజయ్ దేవరకొండకు స్థానం!
- 30 సంవత్సరాల లోపు ప్రతిభ కనబరిచిన వారి పేర్లు
- విజయ్ దేవరకొండ వయసు 29 ఏళ్లు
- 'నువ్విలా' సినిమాతో చిత్ర రంగ ప్రవేశం
ప్రముఖ యువ హీరో విజయ్ దేవరకొండకు 2019- ఫోర్బ్స్ ఇండియా ‘30 అండర్ 30‘లో చోటు దక్కింది. భారత్ లో ముప్పై సంవత్సరాల కన్నా తక్కువ వయసుకు చెందిన, ఆయా రంగాల్లో అద్భుత ప్రతిభ కనబరిచిన వారికి ఈ జాబితాలో స్థానం కల్పించారు. ఇందుకు సంబంధించిన జాబితాను ఫోర్బ్స్ ఈరోజు విడుదల చేసింది. సినీ నటుడిగా తన ప్రతిభను చాటుకున్న విజయ్ దేవరకొండ పేరు ఈ జాబితాలో చేరింది.
ఇరవై తొమ్మిదేళ్ల విజయ్ దేవరకొండ 2011లో ‘నువ్విలా’ చిత్రం ద్వారా నటుడిగా చిత్ర రంగంలోకి అడుగుపెట్టాడు. 2012లో ‘లైఫ్ ఈజ్ బ్యూటీఫుల్’లో అతిథిపాత్రలో నటించాడు. ఆ తర్వాత ‘పెళ్లి చూపులు’తో హిట్ సాధించి, ‘అర్జున్ రెడ్డి’తో ఓ రేంజ్ హిట్ ను సాధించాడు. గత ఏడాది విడుదలైన ‘గీత గోవిందం’ కూడా విజయ్ దేవర కొండకు మంచి పేరు తెచ్చిపెట్టింది. ప్రస్తుతం ‘డియర్ కామ్రేడ్’ చిత్రంలో నటిస్తున్నాడు.
