Chandrababu: అప్పుడే చంద్రబాబు దుష్ప్రచారం ప్రారంభించారు: భూమన కరుణాకర్ రెడ్డి
- రాష్ట్రాల హక్కులు సాధించేందుకే కేటీఆర్-జగన్ భేటీ
- చంద్రబాబు అనేక రుగ్మతలతో బాధపడుతున్నారు
- జగన్ పేరు వింటేనే చంద్రబాబు వణికిపోతున్నారు
టీఆర్ఎస్-వైసీపీలు పొత్తుపెట్టుకుంటున్నాయంటూ టీడీపీ అధినేత చంద్రబాబు నాయుడు అప్పుడే దుష్ప్రచారం ప్రారంభించారని వైసీపీ ప్రధాన కార్యదర్శి భూమన కరుణాకర్ రెడ్డి మండిపడ్డారు. తిరుపతి ప్రెస్ క్లబ్ లో ఈరోజు ఆయన మీడియాతో మాట్లాడుతూ, రాష్ట్రాల హక్కులు సాధించే క్రమంలోనే కేటీఆర్-జగన్ ల భేటీ జరిగిందని, ఈ భేటీపై వక్రభాష్యాలు చెప్పడం తగదని హితవు పలికారు. చంద్రబాబు అనేక రుగ్మతలతో బాధపడుతున్నారని, కొత్తగా ఆయనకు మానసిక రుగ్మత కూడా తోడైనట్టయిందని వ్యాఖ్యానించారు. జగన్ పేరు వింటేనే చంద్రబాబు వణికిపోతున్నారని, ఆయనకు నిద్ర కూడా పట్టడం లేదంటూ ఘాటు వ్యాఖ్యలు చేశారు.
