జగన్ ని విమర్శించేందుకు చంద్రబాబు వద్ద ఉన్న ఒకే ఒక్క ఆయుధమిది!: ఉండవల్లి అరుణ్ కుమార్

జగన్ పై విమర్శలు చేసేందుకు చంద్రబాబు వద్ద ఉన్న ఒకే ఒక్క ఆయుధం.. ఆయనపై ఉన్న అవినీతి ఆరోపణల కేసులు, కోర్టు చుట్టూ తిరగడమేనని ప్రముఖ రాజకీయవేత్త ఉండవల్లి అరుణ్ కుమార్ అభిప్రాయపడ్డారు. ఓ ఇంటర్వ్యూలో ఆయన మాట్లాడుతూ, జగన్ ప్రతి శుక్రవారం కోర్టుకెళుతున్నారని చంద్రబాబు ప్రచారం చేస్తున్నారని విమర్శించారు.

ఏదేమైనప్పటికీ, జగన్ పై ఉన్న అవినీతి ఆరోపణల కేసులు, కోర్టు చుట్టూ తిరగడం వంటివన్నీ కూడా ఆయనకు మైనస్ పాయింట్లేనని అన్నారు. అయితే, జగన్ పై ఆరోపించిన అవినీతి కేసుల్లో సత్తా లేదని, ఈ ఆరోపణలన్నీ చాలా పేలవమైనవని, మన దేశంలో ‘క్విడ్ ప్రో కో’కు సంబంధించి నిలబడ్డ కేసులు లేవని అన్నారు. జగన్ ఫలానా వ్యక్తితో, ఐఏఎస్ అధికారితో మాట్లాడారన్న విషయాలను ఛార్జిషీట్ లో ఎక్కడా పెట్టలేదని, తన ఉద్దేశంలో అయితే ఈ కేసులేవీ నిలబడేవి కాదని అన్నారు.