paruchuri: రజనీకాంత్ ఆఫర్ ను స్వీకరించలేకపోయాము: పరుచూరి గోపాలకృష్ణ
- రజనీ మాకు కథ చెప్పారు
- డైలాగ్స్ విని అభినందించారు
- తెలుగులో 'బాబా'కి మాటలు రాయమన్నారు
పరుచూరి గోపాలకృష్ణ తాజాగా 'పరుచూరి పలుకులు' కార్యక్రమంలో మాట్లాడుతూ రజనీకాంత్ గురించిన కొన్ని ఆసక్తికరమైన విషయాలను చెప్పుకొచ్చారు. "మోహన్ బాబుగారితో కొన్ని హిట్ సినిమాలకి పనిచేశాము. ఆ తరువాత తన తదుపరి సినిమా కోసం రజనీకాంత్ దగ్గరున్న కథను వినమని ఆయన అన్నారు. రజనీ చెప్పిన కథ విన్నాము .. ఒక సూపర్ స్టార్ రాసిన కథను వినడం చిత్రమైన అనుభూతి .. నిజంగానే చాలా బాగుంది.
ఆ కథతో చేసిన సినిమానే 'రాయలసీమ రామన్న చౌదరి'. ఈ సినిమాలో "మళ్లీ వెంట్రుకలు వస్తాయనే నమ్మకంతో గుండు కొట్టించుకుంటున్నారు గానీ, మళ్లీ వెంట్రుకలు మొలవవంటే తలనీలాలు ఇస్తారా?" వంటి డైలాగ్స్ రజనీకాంత్ కి బాగా నచ్చాయి. ఆ తరువాత ఆయన నాకు ఫోన్ చేసి తన 'బాబా' సినిమాకి తెలుగులో సంభాషణలు రాసిపెట్టమన్నారు. ఇంతవరకూ లిప్పుకి డైలాగ్ రాయడం మాకు తెలియదు సార్ .. క్షమించండి' అన్నాను. అలా రజనీ ఇచ్చిన ఆఫర్ ను స్వీకరించలేకపోయాము" అని అన్నారు.
