rajani: 500 కోట్ల క్లబ్ లో '2.ఓ' .. నైజామ్ లోను సరికొత్త రికార్డ్
- కొనసాగుతోన్న '2.ఓ' జోరు
- నైజామ్ లో 17 కోట్ల షేర్
- సెలవుల కారణంగా పెరగనున్న వసూళ్లు
ఆసక్తికరమైన కథాకథనాలు .. ఆశ్చర్యచకితులను చేసే గ్రాఫిక్స్ తో '2.ఓ' ప్రేక్షకులను మంత్ర ముగ్ధులను చేస్తోంది. విడుదలైన ప్రతి చోటున ఈ సినిమా విజయ విహారం చేస్తోంది. కొత్త రికార్డులను నమోదు చేస్తూ దూసుకుపోతోంది. తొలివారంలో ఈ సినిమా ప్రపంచవ్యాప్తంగా 500 కోట్లను రాబట్టింది. తెలుగు .. తమిళ .. హిందీ వెర్షన్లలో కలిపి ఈ సినిమా ఈ స్థాయి వసూళ్లను సాధించింది.
ఇక నైజామ్ లోను ఈ సినిమా కొత్త రికార్డును సొంతం చేసుకుంది. తొలి వారంలో ఈ సినిమా ఇక్కడ 17 కోట్ల షేర్ ను రాబట్టింది. ఒక అనువాద చిత్రానికి ఇక్కడ ఈ స్థాయి వసూళ్లు దక్కడం ఇదే మొదటిసారి అని అంటున్నారు. ఈ విధంగా '2.ఓ' ఇక్కడ సరికొత్త రికార్డును నమోదు చేసిందని చెబుతున్నారు. వరుసగా వచ్చిన సెలవుల కారణంగా ఈ సినిమా వసూళ్లు మరింతగా పెరిగే అవకాశం కనిపిస్తోంది. హిందీ వెర్షన్ నిన్న ఒక్క రోజునే 10 కోట్ల షేర్ ను రాబట్టడం విశేషం.
