Bengaluru: ఆ పోర్న్ వీడియోలో ఉన్నది నువ్వే కదా.. భార్యకు నరకం చూపిస్తున్న శాడిస్ట్ భర్త
- పోర్న్ వీడియోలకు బానిసగా మారిన భర్త
- ఓ వీడియోలోని మహిళ భార్యలా ఉండడంతో అనుమానం
- పోలీసులు చెప్పినా వినిపించుకోని శాడిస్ట్
అశ్లీల వీడియోలోని ఓ మహిళ తన భార్యను పోలి ఉండడంతో అనుమానం పెంచుకున్న భర్త ఆమెను చిత్ర హింసలకు గురిచేయడం మొదలుపెట్టాడు. ఎందుకిలాంటి పనిచేస్తున్నావంటూ నరకం చూపించాడు. అతడి బాధలు భరించలేని ఆమె పుట్టింటికి చేరుకుంది. బెంగళూరులో జరిగిందీ ఘటన. పోలీసుల కథనం ప్రకారం..
బెంగళూరు ఈస్ట్‌కు చెందిన వెంకటేశ్‌కు ఆంధ్రప్రదేశ్‌కు చెందిన లక్ష్మి (31)తో ఆరేళ్ల క్రితం వివాహమైంది. ఓ ఈకామర్స్ సంస్థలో డెలివరీ బాయ్‌గా పనిచేస్తున్న వెంకటేశ్ పోర్న్ వీడియోలకు బానిసగా మారాడు. ఇటీవల ఓ వీడియో చూసిన అతడికి అందులోని మహిళ తన భార్యేనన్న అనుమానం వచ్చింది. ఇక అప్పటి నుంచి ఆమెను వేధించడం మొదలుపెట్టాడు. ఎందుకిలాంటి పని చేస్తున్నావని ప్రశ్నించాడు. అది తాను కాదని, ఆ వీడియోకు తనకు ఎటువంటి సంబంధం లేదని లక్ష్మి ఎంతగానో చెప్పి చూసింది. అయినా నమ్మని వెంకటేశ్ ఆమెను నిత్యం హింసించేవాడు. దీంతో ఆమె పోలీసులను ఆశ్రయించింది.
వెంకటేశ్-లక్ష్మిలను పోలీస్ స్టేషన్‌కు పిలిపించిన పోలీసులు వెంకటేశ్‌కు కౌన్సెలింగ్ నిర్వహించారు. ఆ వీడియోను పరిశీలించిన సైబర్ పోలీసులు అది లక్ష్మి కాదని, దానిని విదేశాల్లో అప్‌లోడ్ చేశారని చెప్పారు. అయినప్పటికీ వినిపించుకోని వెంకటేశ్ ఆమె తన భార్యేనని, ఇద్దరి పుట్టుమచ్చలు కూడా ఒకేలా ఉన్నాయంటూ మరో వాదన తీసుకొచ్చాడు. పోలీసులే అబద్ధం చెబుతున్నారని ఆరోపించాడు. భార్యను మరింతగా వేధించడం మొదలుపెట్టాడు. దీంతో భరించలేని ఆమె తన బిడ్డను తీసుకుని పుట్టింటికి వెళ్లిపోయింది.
