somnath bharathi: మహిళా యాంకర్ ను దూషించిన సోమనాథ్ భారతి.. కేసు నమోదు
- ఫోన్ ద్వారా ఓ టీవీ ఛానల్ చర్చలో పాల్గొన్న సోమనాథ్ భారతి
- యాంకర్ ను తీవ్ర పదజాలంతో తిట్టాడనేది ఆరోపణ
- నోయిడా పోలీసులకు ఫిర్యాదు చేసిన టీవీ ఛానల్ యాజమాన్యం
ఆమ్ ఆద్మీ పార్టీ ఎమ్మెల్యే సోమనాథ్ భారతిపై పోలీసు కేసు నమోదైంది. ఓ మహిళా యాంకర్ ను రాయకూడని పదజాలంతో తిట్టాడనే ఆరోపణలో కేసు నమోదు చేశారు. వివరాల్లోకి వెళ్తే, మంగళవారం సాయంత్రం నోయిడాకు చెందిన ఓ టీవీ చర్చా కార్యక్రమంలో సోమనాథ్ భారతి ఫోన్ ద్వారా పాల్గొన్నారు. ఈ సందర్భంగా కార్యక్రమాన్ని నిర్వహిస్తున్న మహిళా యాంకర్ ను తీవ్ర పదజాలంతో తిట్టాడనేది ఆయనపై ఉన్న ఆరోపణ. సదరు టీవీ ఛానల్ యాజమాన్యం నోయిడా పోలీసులకు ఫిర్యాదు చేయడంతో ఆయనపై కేసు నమోదైంది. ఈ నేపథ్యంలో సోమనాథ్ భారతి మాట్లాడుతూ, ఆడియో టేపును ఎడిట్ చేశారని, వాయిస్ లో కూడా తేడా ఉందని అన్నారు. మొత్తం ఆడియో టేప్ ను విడుదల చేయాలని, లేకపోతే చట్టపరమైన చర్యలకు దిగుతానని చెప్పారు.
