Biggboss: బిగ్ బాస్ సీజన్ -2 విన్నర్ కౌశల్, రన్నరప్ గీతామాధురి?
- నేటితో ముగియనున్న బిగ్ బాస్-2
- గెలిచింది కౌశలేనంటున్న సోషల్ మీడియా
- మరికొన్ని గంటల్లో తెలియనున్న వాస్తవం
దాదాపు నాలుగు నెలల పాటు తెలుగు టీవీ ప్రేక్షకులను అలరించిన బిగ్ బాస్-సీజన్ 2 నేటితో ముగియనుంది. ప్రతి వారంలో ఎలిమినేట్ ఎవరు అవుతున్నారన్న విషయం ఒకరోజు ముందుగానే బయటకు వస్తున్న సంగతి తెలిసిందే. ఇక నేడు కూడా ఓ లీక్ బయటకు వచ్చింది. గ్రాండ్ ఫినాలే షూటింగ్ నిన్ననే పూర్తికాగా, గెలిచింది కౌశల్ అని, రన్నరప్ గా గీతామాధురి నిలిచిందని సోషల్ మీడియాలో కామెంట్లు వస్తున్నాయి.
ప్రేక్షకుల నుంచి అపూర్వ మద్దతు పొందిన కౌశల్ టైటిల్ సొంతం చేసుకున్నాడని, ప్రచారం జరుగుతోంది. రన్నరప్ గా గీతామాధురి నిలిచిందని చెబుతున్నారు. ఇక, నేడు ప్రసారం అయ్యే గ్రాండ్ ఫినాలేకు సంబంధించిన ఫొటోలు కూడా సామాజిక మాధ్యమాల్లో కనిపిస్తున్నాయి. నాని పక్కన నిలబడి కౌశల్ మాట్లాడుతున్న ఫొటోలు వైరల్ అవుతున్నాయి. ఇక, అసలు విజేత ఎవరు? అన్న విషయం తెలియాలంటే, మరికొన్ని గంటలు వేచి చూడాల్సిందే.
