RTC: మేల్కొన్న ఆర్టీసీ.. కొండగట్టుకు రెండు మినీ బస్సులు!
- ఉదయం 6 నుంచి సాయంత్రం 5.30 గంటలవరకూ సర్వీసులు
- కలెక్టర్ చేతుల మీదుగా ఈ రోజు ప్రారంభం
- మరో రెండు బస్సులను నడుపుతామన్న ఆర్టీసీ
జగిత్యాల జిల్లా కొండగట్టులో జరిగిన ఘోర రోడ్డు ప్రమాదంలో 61 మంది ప్రాణాలు కోల్పోయిన సంగతి తెలిసిందే. బస్సు ఫిట్ నెస్ లేకపోవడం, ఓవర్ లోడ్ కారణంగానే ఈ ఘటన జరిగినట్లు వార్తలు వచ్చాయి. ఈ నేపథ్యంలో ఆర్టీసీ అధికారులు దిద్దుబాటు చర్యలు చేపట్టారు. ఈ మార్గంలో ప్రజలు ప్రైవేటు వాహనాలను ఆశ్రయించకుండా ప్రత్యేకంగా రెండు మినీ బస్సులను నడుపుతామని ఆర్టీసీ అధికారులు ప్రకటించారు.
ఈ రోజు నుంచి రెండు మినీ బస్సు సర్వీసులు నడుస్తాయన్నారు. కొండగట్టు గుట్ట నుంచి జేఎన్ టీయూ, పిల్లలమర్రి, దిగువ కొండగట్టు వరకూ ఈ మినీ బస్సు సర్వీసులు నడుపుతామని వెల్లడించారు. ఉదయం 6 గంటల నుంచి సాయంత్రం 5:30 గంటల వరకు మొత్తం 11 ట్రిప్పుల చొప్పున ఈ బస్సులు తిరగనున్నాయి. ప్రయాణికుల రద్దీని బట్టి మరో రెండు బస్సులు ఏర్పాటు చేయాలని అధికారులు నిర్ణయించారు.ఈ బస్సులను జిల్లా కలెక్టర్ శరత్ ప్రారంభించనున్నారు. కాగా, ఘాట్ రోడ్డుపైకి సొంత వాహనదారులను అనుమతించే విషయమై త్వరలోనే నిర్ణయం తీసుకుంటామని ఉన్నతాధికారులు తెలిపారు.
