miryala guda: మీ పెళ్లి వీడియో కంటే వాడి చావు వీడియోకే ఎక్కువ లైక్స్ వస్తాయ్!: అమృతకు తండ్రి వార్నింగ్
- వివాహం తర్వాత ఫొటో షూట్ నిర్వహించిన జంట
- వీడియోను ఫేస్ బుక్ లో చూసి రగిలిపోయిన తండ్రి
- గుండెలవిసేలా రోదిస్తున్న అమృత
మిర్యాలగూడలో కుమార్తె ఇష్టం లేని పెళ్లి చేసుకోవడంతో అల్లుడు ప్రణయ్ ను మామ మారుతీరావు కిరాతకంగా హత్య చేయించిన సంగతి తెలిసిందే. ఈ ఘటనకు సంబంధించి షాకింగ్ విషయం వెలుగులోకి వచ్చింది. పెళ్లి చేసుకున్న తర్వాత ప్రణయ్-అమృతలు వీడియో షూట్ నిర్వహించారు. ఈ వీడియోను ఫేస్ బుక్ లో పోస్ట్ చేశారు. దీన్ని చూసిన ఆమె తండ్రి రగిలిపోయాడు. అమృతకు ఫోన్ చేసి ‘మీ పెళ్లి వీడియో కంటే వాడిని నేను చంపే వీడియోకే ఎక్కువ లైక్స్ వస్తాయ్’ అంటూ హెచ్చరించాడని కుటుంబ సభ్యుడొకరు తెలిపారు.
ఈ వివాహానికి ప్రణయ్ కుటుంబం కూడా అంగీకరించలేదనీ, అయితే అమృత లేకుండా తాను బతకలేనని ప్రణయ్ చెప్పడంతో వెనక్కి తగ్గారని వెల్లడించారు. తన భర్త ప్రణయ్ ను చూస్తాననీ, ఒక్కసారి అక్కడకు తీసుకెళ్లాలని అమృత ఆసుపత్రిలో గుండెలవిసేలా రోదిస్తోంది.
