paruchuri: రామారావుగారికి కోపం వస్తోంది .. హరికృష్ణ వచ్చి గబగబా నన్ను బయటికి తీసుకెళ్లాడు: పరుచూరి గోపాలకృష్ణ
- 'చండశాసనుడు' స్క్రిప్ట్ పనులు జరుగుతున్నాయి
- ఈ సినిమాకి దర్శకుడు రామారావుగారే
- ఆయన మాటలకు మధ్యలో నేను అడ్డు తగిలాను
ఎన్టీఆర్ నటించిన చాలా సినిమాలకి పరుచూరి గోపాలకృష్ణ పనిచేశారు. తాజాగా ఆయన తనకి .. హరికృష్ణకు సంబంధించిన కొన్ని సంఘటనలను గురించి చెప్పుకొచ్చారు. మద్రాసులో 'చండశాసనుడు' సినిమాకి సంబంధించిన స్క్రిప్ట్ పై కూర్చున్నాం. అన్నగారు .. నేను మాట్లాడుకుంటూ ఉండగా, గుమ్మం దగ్గరే హరికృష్ణ నుంచుని వున్నారు. స్క్రిప్ట్ గురించి మాట్లాడుతూ అన్నగారు చెప్పినదానికి సమాధానంగా, 'అలాగైతే బాగోదండి .. కరెక్ట్ కాదు' అని ఎమోషనల్ గా చెప్పాను.
దాంతో రామారావుగారికి కోపం వచ్చేస్తోంది .. అది గమనించిన హరికృష్ణ గబగబా నా దగ్గరికి వచ్చి నా రెక్క పట్టుకుని బయటికి తీసుకెళ్లాడు. ' ప.గో' ఎవరితో మాట్లాడుతున్నావో తెలుసా .. ఎన్టీ రామారావుగారితో మాట్లాడుతున్నావ్' అన్నాడు. 'నిజమే నాన్నా .. ఎన్టీఆర్ గారు నాకు దైవం .. కానీ ఇక్కడ నేను మాట్లాడుతున్నది ఆయనతో కాదు .. ఈ సినిమా దర్శకుడితో. ఆయన ఈ సినిమాకి డైరెక్టర్ గనుక ఒక రైటర్ గా నా భావం చెబుతున్నాను' అన్నాను. 'ఏవైనా ఎప్పుడూ ఒకటి గుర్తు పెట్టుకో .. ఆయన ముందు వాయిస్ ఒక స్థాయిని దాటి వెళ్లడానికి లేదు' అన్నాడు. ఆ తరువాత నుంచి ఆయన నాకు మరింత ఆత్మీయుడు అయ్యాడు' అని చెప్పుకొచ్చారు.
