motkupalli: భోరున విలపించిన మోత్కుపల్లి.. చంద్రబాబుకు పాలించే అర్హత లేదంటూ తీవ్ర వ్యాఖ్యలు
- చంద్రబాబు మోసం చేశారు
- ఆయనకు పాలించే అర్హత కూడా లేదు
- నా రాజకీయ జీవితాన్ని బలి చేశారు
టీడీపీ అధినేత చంద్రబాబుపై టీటీడీపీ నేత మోత్కుపల్లి తీవ్ర వ్యాఖ్యలు చేశారు. తనను గవర్నర్ చేస్తానని, రాజ్యసభకు పంపిస్తానని చెప్పిన చంద్రబాబు... ఆ తర్వాత మోసం చేశారని అన్నారు. పార్టీ కష్టాల్లో ఉన్నప్పుడు తాను అండగా ఉన్నానని... ఇప్పుడు కనీసం మహానాడు కార్యక్రమానికి కూడా ఆహ్వానించలేదని వాపోయారు. ఎన్టీఆర్ పార్టీకి తనను దూరం చేశారని కన్నీళ్లు పెట్టుకున్నారు. ఈ సందర్భంగా తీవ్ర భావోద్వేగానికి లోనైన ఆయన... కన్నీటిపర్యంతం అయ్యారు. ఎన్టీఆర్ జయంతి సందర్భంగా ఘాట్ వద్ద నివాళి అర్పించిన అనంతరం, మీడియాతో మాట్లాడుతూ ఆయన ఏడ్చేశారు.
ఎన్టీఆర్ ఆశీర్వాదం వల్లే తాను రాజకీయాల్లో ఉన్నానని చెప్పారు. తన రాజకీయ జీవితాన్ని బలి చేస్తున్నారని ఆవేదన వ్యక్తం చేశారు. చంద్రబాబుకు పాలించే అర్హత కూడా లేదని మోత్కుపల్లి తీవ్ర వ్యాఖ్యలు చేశారు. ఎన్టీఆర్ జయంతికి కాని, వర్ధంతికి కాని ఘాట్ వద్దకు వచ్చి చంద్రబాబు ఎప్పుడైనా నివాళి అర్పించారా? అని ప్రశ్నించారు.
