Pawan Kalyan: ఈసారి రవి ప్రకాశ్ వంతు.. వరుస ట్వీట్లతో విరుచుకుపడుతున్న పవన్!
- నువ్వు దేవుడిని, పూజలను కూడా నమ్ముతావా? అంటూ రవిప్రకాశ్‌కు ప్రశ్న
- నోరు మూసుకుని కూర్చున్నందుకే తనపై లేనిపోనివి రాస్తున్నారన్న పవన్
- తాను పంపిన క్లిప్పింగులతో షో చేయాలని సూచన
జనసేన అధినేత పవన్ కల్యాణ్ తన ట్వీట్ల ప్రవాహాన్ని కొనసాగిస్తున్నారు. గత రాత్రి ఏబీఎన్-ఆంధ్రజ్యోతి ఎండీ రాధాకృష్ణ ఫొటో పోస్టు చేసి భోజనంలో కాస్తంత సంస్కారాన్ని కూడా వడ్డించమని కుమారుడికి సలహా ఇచ్చి గుడ్ నైట్ చెప్పిన పవన్ మళ్లీ ఉదయాన్నే వరుస ట్వీట్లతో ముందుకొచ్చారు.
టీవీ 9 సీఈవో రవి ప్రకాశ్‌కు గుడ్ మార్నింగ్ చెబుతూ రవిప్రకాశ్ దంపతులు పూజలో ఉన్న ఫొటోను పోస్టు చేశారు. ‘నువ్వు దేవుడిని, పూజలను కూడా నమ్ముతావా’ అని క్యాప్షన్ తగిలించారు. ఆ తర్వాత మరో ట్వీట్ చేస్తూ ‘‘నీకు కొన్ని ఆర్టికల్స్ పంపిస్తున్నాను. వీటితో కూడా ఏమైనా షో చేయగలవా?’’ అని ప్రశ్నించారు. అనంతరం మరో ట్వీట్‌లో రవి ప్రకాశ్‌కు బహిరంగ లేఖ పేరుతో కొన్ని ఆర్టికల్ క్లిప్పింగులు విడుదల చేశారు. ఈ క్లిప్పింగుల ఆధారంగా రాత్రి 9 గంటల షో చేసి సమన్యాయం చేయాలని సూచించారు. తాము నోరు మూసుకుని ఉంటున్నందుకే తమపై విషం కక్కుతున్నారని ఆరోపించారు.
అలాగే టీవీ 9 అధినేత శ్రీనిరాజుపైనా పవన్ విరుచుకుపడ్డారు. ‘‘ఐఎస్‌బీ లాంటి ప్రతిష్ఠాత్మక సంస్థకు బోర్డు మెంబరుగా ఉన్న నీవు.. నీ చానెల్‌లో మాత్రం అభ్యంతరకరమైన వార్తలు ప్రసారం చేస్తావా? కాస్త, గౌరవప్రదంగా నడుచుకోవడం నేర్చుకో’’ అని సూచించారు.
