Anushka Sharma: పేరున్న పత్రిక అలా వ్యవహరిస్తుందని భావించలేదు... ఫేక్ ఇంటర్వ్యూపై అనుష్కశర్మ సీరియస్!
- ఫిబ్రవరి 20న ఇన్ స్టా గ్రాంలో రొమాంటిక్ ఫొటో పోస్టు చేసిన కోహ్లీ
- వైరల్ గా మారిన ఫోటో
- ఆ ఫొటోపై అనుష్క ఇంటర్వ్యూ ఇచ్చిందన్న ఈ-సమయ్ పత్రిక
ఫిబ్రవరి 20 వ తేదీన టీమిండియా కెప్టెన్ విరాట్ కోహ్లి తన ఇన్ స్టాగ్రామ్‌ లో భార్య అనుష్కతో దిగిన రొమాంటిక్ ఫొటోను పోస్టు చేసిన సంగతి విదితమే. వెనుకనున్న ఓ చిత్రపటంలోని పోజును ఇమిటేట్ చేస్తూ .. వీరిద్దరూ దిగిన ఆ ఫొటో సోషల్ మీడియాలో వైరల్ గా మారింది. దీనిని ఇప్పటికే సుమారు 35 లక్షల మంది లైక్ చేశారు.
ఇక వైరల్ గా మారిన ఆ ఫోటోపై అనుష్క తమకు ఇంటర్వ్యూ ఇచ్చిందంటూ ఈ-సమయ్ అనే ఓ పత్రిక ఒక కథనాన్ని ప్రచురించింది. దీనిపై ట్విట్టర్ మాధ్యమంగా అనుష్క మండిపడింది. ఆ పత్రిక ప్రచురించింది ఫేక్ ఇంటర్వ్యూ అని చెప్పింది. దానిని చూసి తాను షాక్ తిన్నానని, పేరున్న పత్రిక అలా వ్యవహరిస్తుందని తాను భావించలేదని అనుష్క ట్వీట్ చేసింది. తన వ్యక్తిగత జీవితంపై ఎవరికీ ఇంటర్వ్యూ ఇవ్వలేదని తేల్చి చెప్పింది.
