Narendra Modi: మోదీ, చంద్ర‌బాబుల పాల‌న అంబేద్క‌ర్ ఆలోచ‌న‌ల‌కు విరుద్ధంగా జ‌రుగుతోంది: ర‌ఘువీరారెడ్డి
- నేడు అంబేద్క‌ర్ 61వ వ‌ర్థంతి
- విజ‌య‌వాడ‌లోని ఏపీసీసీ కార్యాల‌యంలో అంబేద్క‌ర్‌కు నివాళి
- అంబేద్క‌ర్ దళితుల‌కే కాక దేశ ప్ర‌జ‌లంద‌రికీ మార్గ‌ద‌ర్శ‌కుడు- ర‌ఘువీరారెడ్డి
భార‌త ప్ర‌జాస్వామ్యం ఇంత ప‌టిష్టంగా కొన‌సాగుతోందంటే దానికి కార‌ణం బీఆర్ అంబేద్క‌ర్ చేసిన కృషి ఫ‌లిత‌మేన‌ని ఏపీసీసీ అధ్య‌క్షుడు ర‌ఘువీరారెడ్డి అన్నారు. ఈ రోజు రాజ్యాంగ పితామ‌హుడు అంబేద్క‌ర్ 61వ వ‌ర్థంతి సంద‌ర్భంగా విజ‌య‌వాడ‌లోని ఏపీసీసీ కార్యాల‌యంలో ఆయ‌న‌కు ఘ‌నంగా నివాళుల‌ర్పించారు. ఈ సంద‌ర్భంగా ర‌ఘువీరారెడ్డి మాట్లాడుతూ... అంబేద్క‌ర్ ఆశ‌యాల‌ను కొన‌సాగించేందుకు త‌మ పార్టీ కృషి చేస్తుంద‌ని అన్నారు.
అంబేద్క‌ర్ దళితుల‌కే కాక ఈ దేశ ప్ర‌జ‌లంద‌రికీ మార్గ‌ద‌ర్శ‌కుడ‌ని అన్నారు. నేటి ప్ర‌ధానమంత్రి మోదీ, ఏపీ ముఖ్య‌మంత్రి చంద్ర‌బాబు పాల‌న‌లో మైనార్టీలు, బ‌ల‌హీన వ‌ర్గాలు, ద‌ళితులు, ఆదివాసులు, మ‌హిళ‌లు అభ‌ద్ర‌తాభావానికి గుర‌వుతున్నార‌ని విమ‌ర్శించారు. మోదీ, చంద్ర‌బాబు పాల‌న అంబేద్క‌ర్ ఆలోచ‌న‌ల‌కు విరుద్ధంగా జ‌రుగుతోంద‌ని చెప్పారు.
