india america nuclear deal: భారత్-అమెరికాల మధ్య అణు ఒప్పందం ఓ విఫల ప్రయోగం: అమెరికా మాజీ సెనేటర్
- ముందస్తు కసరత్తు లేకుండానే ఒప్పందం జరిగింది
- ఆయుధ కంపెనీలకు మేలు చేసేలా ఒప్పందం
- ఒబామా పర్యటన ఆయుధాల అమ్మకాల కోసమే
భారత్, అమెరికా దేశాల మధ్య జరిగిన పౌర అణు ఒప్పందం ఓ విఫల ప్రయోగమని అమెరికా మాజీ సెనేటర్ లారీ ప్రెస్లర్ అన్నారు. గతంలో ఈయన యూఎస్ సెనేట్ ఆయుధ నియంత్రణ సబ్ కమిటీకి ఛైర్మన్ గా వ్యవహరించారు. ఎలాంటి ముందస్తు కసరత్తు లేకుండానే ఈ ఒప్పందాన్ని తెరపైకి తీసుకొచ్చారని... ఆ తర్వాత డిఫెన్స్ ఆయుధ కంపెనీలకు ప్రయోజనం చేకూర్చే ఒప్పందంలా దీన్ని మార్చారని ఆయన విమర్శించారు. ఎలాంటి గ్రౌండ్ వర్క్ లేకుండానే ఒప్పందంపై సంతకాలు చేశారని... దీంతో, ఆదిలోనే ఈ ఒప్పందానికి తూట్లు పడ్డాయని చెప్పారు. 2008 అక్టోబరులో ఈ ఒప్పందంపై సంతకాలు జరిగాయని, అప్పటి అమెరికా అధ్యక్షుడు ఒబామా భారత్ లో పర్యటించారని... అయితే, అది కేవలం ఆయుధాల విక్రయం కోసం చేపట్టిన యాత్ర మాత్రమేనని ఆయన స్పష్టం చేశారు. ఈయన చేసిన వ్యాఖ్యలు ప్రస్తుతం సంచలనం రేకెత్తిస్తున్నాయి.
