ola cabs: క్యాబ్‌లో పుట్టిన బాబు... తల్లీబిడ్డలకు ఐదేళ్ల పాటు ఉచిత ప్ర‌యాణ సౌక‌ర్యం!
- ప్ర‌క‌టించిన ఓలా క్యాబ్స్
- డ్రైవ‌ర్‌కి స‌త్కారం
- కృత‌జ్ఞ‌త‌లు తెలిపిన పూణె దంప‌తులు
ఇటీవ‌ల త‌మ విమానంలో బిడ్డ‌ను ప్ర‌స‌వించినందుకు ఓ విమాన సంస్థ ఆ బిడ్డ‌కు ఉచిత ప్ర‌యాణ సౌక‌ర్యాన్ని క‌ల్పించిన సంగ‌తి తెలిసిందే. అదే బాట‌లో ప్ర‌ముఖ క్యాబ్ స‌ర్వీస్ సంస్థ ఓలా క్యాబ్స్ కూడా త‌మ క్యాబ్‌లో బాబుకు జ‌న్మనిచ్చినందుకు ఆ బాబుకు ఐదేళ్ల పాటు ఉచిత క్యాబ్ ప్ర‌యాణ సౌక‌ర్యం క‌ల్పించింది.
పూణెలోని కొంధ్వా ప్రాంతానికి చెందిన ఈశ్వ‌రీ సింగ్ విశ్వ‌క‌ర్మకు పురిటి నొప్పులు ప్రారంభం కావడంతో ఆసుప‌త్రికి తీసుకెళ్ల‌డానికి ఆమె భ‌ర్త ర‌మేశ్ సింగ్ విశ్వ‌క‌ర్మ ఓలా క్యాబ్ బుక్ చేశాడు. అయితే ఆసుప‌త్రి చేరుకునే లోపే కార్లోనే ఈశ్వ‌రీ సింగ్ పండంటి బాబుకు జ‌న్మ‌నిచ్చింది. ఈ విష‌యం తెలుసుకున్న ఓలా క్యాబ్స్ సంస్థ త‌ల్లికి, బిడ్డ‌కి ఐదేళ్ల పాటు ఉచిత ప్ర‌యాణ స‌దుపాయం క‌ల్పిస్తున్నట్లు ప్ర‌క‌టించింది.
ఓ ప్ర‌త్యేక కూప‌న్ కోడ్ ద్వారా ఈ స‌దుపాయాన్ని వినియోగించుకోవ‌చ్చ‌ని తెలిపింది. అంతేకాకుండా త‌మ డ్రైవ‌ర్‌ను కూడా స‌త్క‌రించింది. ఈశ్వ‌రీ సింగ్ డిశ్చార్జి అవుతున్న రోజు కూడా అదే డ్రైవ‌ర్‌ని పంపించి వినియోగ‌దారుల‌పై త‌న శ్ర‌ద్ధ‌ను క‌న‌బ‌రిచింది.
