వేంకటేశ్వరుడి మహిమ

కలియుగ దైవమైన శ్రీ వేంకటేశ్వరస్వామి చిత్ర పటం పూజా మందిరంలో లేని ఇల్లు దాదాపుగా కనిపించదనే చెప్పాలి. ఆపద మొక్కుల వాడిగా భక్తులకు ఆయన అంతగా దగ్గరయ్యాడు. అలాంటి ఆ స్వామి తన సంకల్ప బలంతో వెలసిన క్షేత్రాలు కొన్ని దర్శనమిస్తాయి. అలాంటి అరుదైన క్షేత్రాల్లో 'లేదాళ్ల' ఒకటిగా కనిపిస్తుంది.

వరంగల్ జిల్లా ఆత్మకూరు మండలం పరిధిలో ఈ క్షేత్రం అలరారుతోంది. రెడ్డి దొరల కాలంలో స్వామి ఈ గ్రామానికి వచ్చినట్టుగా చెబుతారు. రెడ్డి దొరలు మరొక గ్రామంలో స్వామివారిని ప్రతిష్ఠించడానికి అన్నిరకాల ఏర్పాట్లు చేసుకున్నారు. అందుకోసం మూల విరాట్టు ప్రతిమను తయారు చేయించిన ప్రదేశం నుంచి ఆ గ్రామానికి 'లేదాళ్ల' గ్రామం మీదుగా ఎడ్ల బండిపై తరలిస్తున్నారు.

'లేదాళ్ల' గ్రామం మధ్యలోకి రాగానే అడుగు ముందుకు వేయకుండా ఎడ్లు మొరాయించాయట. ఎంతగా ప్రయత్నించినా ప్రయోజనం లేకపోవడంతో, ఆ ప్రదేశంలోనే తనని ప్రతిష్ఠించమని స్వామి అలా సంకేతమిచ్చాడని రెడ్డి దొరలు భావించారు. ఆ ప్రదేశంలోనే ఆలయాన్ని నిర్మించి, స్వామివారిని ప్రతిష్ఠించారు. ఇక్కడి స్వామివారి తేజోమయమైన దివ్యమంగళ రూపాన్ని చూసి తీరవలసిందే.