గురువు పాదాలను ఆశ్రయిస్తే చాలు

లోక కల్యాణం కోసం శ్రీమహావిష్ణువు వివిధ అవతారాలను ధరించాడు. వాటిలో రామావతారం ... కృష్ణావతారం పూర్ణావతారాలుగా చెప్పబడుతున్నాయి. అవతార పురుషులైన రాముడు .. కృష్ణుడు ఇద్దరూ కూడా గురుముఖత విద్యలను అభ్యసించినవారే. కొంతమంది భక్తులు తమ ఇష్టదేవతలను గురించి ఆరాధన చేస్తే, ఫలానా గురువును ఆశ్రయించడం వలన మనోభీష్టం నెరవేరుతుందని సాక్షాత్తు దైవమే చెప్పిన సందర్భాలు వున్నాయి.

గురువు యొక్క స్థానం అంతటి విశేషమైనదిగా .. విశిష్టమైనదిగా కనిపిస్తుంది. అలాంటి గురువులలో ఆదిశంకరాచార్యులు .. రాఘవేంద్రస్వామి .. శ్రీపాద శ్రీవల్లభులు ... నృసింహ సరస్వతి .. అక్కల్ కోటస్వామి ... శిరిడీ సాయిబాబా తదితరులు కనిపిస్తుంటారు. వీళ్లంతా కూడా గురుదైవాలుగా పూజించబడుతున్నారు ... కీర్తించబడుతున్నారు.

ఎవరైతే గురువును విశ్వసిస్తారో వాళ్లకి త్రిమూర్తుల కటాక్షం కూడా లభిస్తుందని చెప్పబడుతోంది. గురువు తన పాదాలను ఆశ్రయించినవారి మనోభీష్టాన్ని బట్టి కొంతమందికి జ్ఞానాన్ని ప్రసాదిస్తాడు. దీర్ఘకాలిక వ్యాధులతో బాధలుపడుతోన్న వాళ్లకి ఆరోగ్యాన్ని అందిస్తాడు. అలాగే దారిద్ర్యంతో కష్టాలు పడుతున్నవాళ్లకి సంపదలను అనుగ్రహిస్తాడు. అవయవ లోపంతో అవస్థలు పడుతోన్నవాళ్లకి స్పర్శమాత్రం చేతనే వాటిని ప్రసాదిస్తాడు.

జీవితాన్ని అజ్ఞానం ... దారిద్ర్యం .. అనారోగ్యం తీవ్రమైన స్థాయిలో ప్రభావితం చేస్తుంటాయి. అలాంటివాటి బారి నుంచి నిముక్తిని కలిగించేవారిగా గురువులు కనిపిస్తుంటారు. తమని ఆశ్రయించినవారి పరిస్థితిని గ్రహించి, కోరిన వరాలను ప్రసాదిస్తూ వుంటారు.