'ది కశ్మీర్ ఫైల్స్' చిత్రానికి జాతీయ అవార్డు ఇవ్వడంపై స్టాలిన్ మండిపాటు

వివాదాస్పద చిత్రం 'ది కశ్మీర్ ఫైల్స్' ఘన విజయం సాధించిన సంగతి తెలిసిందే. దేశ వ్యాప్తంగా వివాదాలు, నిరసనల మధ్యే ఈ సినిమా అఖండ విజయాన్ని సాధించి, భారీ కలెక్షన్లను రాబట్టింది. దర్శకుడు వివేక్ అగ్నిహోత్రి తెరకెక్కించిన ఈ చిత్రం ముస్లిం వర్గాలు, సమైక్యవాదుల నుంచి వ్యతిరేకతను ఎదుర్కొంది. బీజేపీ రాజకీయ ప్రయోజనాల కోసం ఈ సినిమాను తెరకెక్కించారని పలువురు విమర్శించారు. 

మరోవైపు, ఈ సినిమాకు జాతీయ అవార్డు దక్కింది. బెస్ట్ ఫిల్మ్ ఆన్ నేషనల్ ఇంటెగ్రిటీ విభాగంలో నర్గీస్ దత్ అవార్డును ఈ చిత్రానికి ప్రకటించారు. ఈ నేపథ్యంలో, ఈ సినిమాపై తమిళనాడు ముఖ్యమంత్రి స్టాలిన్ విమర్శలు గుప్పించారు. విద్వేషాలు రెచ్చగొట్టేలా ఉన్న ఈ సినిమాకు జాతీయ సమైక్యత విభాగంలో అవార్డు ఇవ్వడం సరి కాదని ఆయన అన్నారు. ఇలాంటి చిత్రానికి జాతీయ అవార్డును ఇవ్వడం ముమ్మాటికీ జాతీయ సమగ్రతను దెబ్బతీయడమే అవుతుందని ఆయన మండిపడ్డారు. ఈ మేరకు ఆయన ట్విట్టర్ ద్వారా ఆగ్రహం వ్యక్తం చేశారు.