తీగ జాతి మొక్క నుంచి 'కరోనా' ఔషధం తయారీ... అనుమతి కోసం చూస్తున్న సీఎస్ఐఆర్!

కోక్యులస్ హిర్సుటస్ అంటే ఏంటో చాలామందికి తెలియకపోవచ్చు కానీ, చీపురుతీగ, దూసరతీగ అంటే మాత్రం పల్లెటూళ్లలో ఉండే చాలామంది గుర్తుపట్టేస్తారు. తీగ జాతికి చెందిన ఈ మొక్క ఇప్పుడు శాస్త్రవేత్తల్లో ఆశలు రేకెత్తిస్తోంది. ఇప్పటికే చీపురుతీగ నుంచి తయారుచేసిన ఔషధాన్ని డెంగ్యూపై పరీక్షించారు. అయితే దీని సమర్థత కరోనా వైరస్ పై ఏ మేరకు ఉంటుందన్నది ఆసక్తి కలిగిస్తోంది. ఈ వృక్ష ఆధారిత ఔషధంపై కౌన్సిల్ ఆఫ్ సైంటిఫిక్ అండ్ ఇండస్ట్రియల్ రీసెర్చ్ (సీఎస్ఐఆర్) ఎన్నో ఆశలు పెట్టుకుంది.

ప్రస్తుతం ఈ ఔషధం పనితీరును అంచనా వేసేందుకు ప్రయోగాలు నిర్వహించాలని సీఎస్ఐఆర్ భావిస్తోంది. ఈ మేరకు డ్రగ్ కంట్రోలర్ జనరల్ ఆఫ్ ఇండియా (డీజీసీఐ)కి దరఖాస్తు చేసుకుంది. పరిమిత సంఖ్యలో 50 మంది రోగులపై పరీక్షలు జరిపి ఈ ఔషధం సమర్థతను తెలుసుకోవాలని సీఎస్ఐఆర్ భావిస్తోంది. కోక్యులస్ హిర్సుటస్ నుంచి తయారుచేసిన ఔషధంలో యాంటీ వైరల్ ఎలిమెంట్లు పుష్కలంగా ఉన్నందున డెంగ్యూపై ప్రాథమిక పరీక్షల్లో ప్రభావవంతంగా పనిచేసిందని సీఎస్ఐఆర్ శాస్త్రవేత్తలు తెలిపారు. ఇప్పుడు తాము ఈ ఔషధాన్ని కరోనాపై ప్రయోగించేందుకు డీజీసీఐ అనుమతి కోసం చూస్తున్నామని, దీన్ని దేశంలోని గిరిజనులు ఉపయోగిస్తుంటారని వెల్లడించారు.