: ‘పూరి చేసిన పాపం ఏంటి?’: ఓ సుదీర్ఘ లేఖలో నిలదీస్తున్న దర్శకుడు పూరీ జగన్నాథ్!
డ్రగ్స్ వ్యవహారంలో ఆరోపణలు ఎదుర్కొంటున్న దర్శకుడు పూరీ జగన్నాథ్, ‘పూరి చేసిన పాపం ఏంటీ?’ అంటూ ప్రశ్నిస్తున్నారు. భావోద్వేగంతో రాసిన ఓ సుదీర్ఘ లేఖను తన ఫేస్ బుక్ ఖాతాలో పూరీ జగన్నాథ్ పోస్ట్ చేశారు. పూరీ రాసిన ఈ లేఖ యథాతథంగా..
‘పూరి చేసిన పాపం ఏంటీ?’ అనే టైటిల్ తో ప్రారంభించిన ఈ లేఖలో... ‘రాజకీయ నాయకుడిలా అది చేస్తాం ఇది ఇస్తాం...అని మభ్యపెట్టి గెలిచాక మాట మార్చాడా? మీ నోటికాడ కూడు లాగేసుకొని మీ ఉసురు పోసుకున్నాడా? లేదే... 17 ఏళ్ల క్రింద ఇండస్ట్రీకి వచ్చాడు. గాడ్ ఫాదర్ లేకుండా ఇంతింతై వటుడింతై అన్న చందాన కష్టపడి తానెదుగుతూ తనతో వున్న వారిని ఎదగనిచ్చాడు, భవిష్యత్తునిచ్చాడు.
అతనికి తెలిసిందల్లా ఒకటే, ప్రేక్షకుడు 100 రూపాయలు పెట్టి టికెట్ కొని, ఓ 3 గంటలు తన విలువైన సమయాన్ని సినిమా చూడటం కోసం వెచ్చిస్తే... ఎలా ఆ ప్రేక్షకుడ్ని సినిమా చూస్తున్నంత సేపు తనే హీరో అయితే "అచ్చం ఇలాగే డైలాగులు చెప్తా, ఇలాగే విలన్లని ఇరగ్గొడుతా, హీరోయిన్స్ తో డాన్సులు చేస్తా, " అని తన కష్టాన్ని మరిచిపోయి లీనమయ్యేలా సినిమాలు తీయటం తెలుసు.
పూరి straight forwardగా వుంటాడు. అప్పటికీ ఇప్పటికీ అతనికి తెలియంది ఒకటే, ఒకరికి భజన చేయటం, కొమ్ము కాయడం. బుల్లెట్ స్పీడ్ తో సినిమాలు చేస్తాడు, సందేశాలు సమోసాలు అని సినిమా లో చెబితే ఎవ్వరూ వినరంటాడు. తను చేసే పనికి వందకి వంద శాతం న్యాయం చేశాడు. హిట్టు ఫట్టుతో సంబంధం లేదు. కాలంతో కలిసి ముందుకెళ్లాలనే రమణ మహర్షి సూక్తిని బాగా వంట పట్టించుకున్నాడు కాబట్టే మధ్యలో ఒకసారి నమ్మిన వాళ్లే మోసం చేస్తే .... మరేం పర్లేదు అన్నట్లుగా నష్టాల్ని, కష్టాల్ని ఎంతో ఇష్టంగా చిరునవ్వుతో స్వీకరించాడు.
అందుకే కాబోలు పూరి తీసిన టెంపర్ సినిమా బిగినింగ్ లోనే "జీవితం ఎవ్వడ్నీ వదలదు. అందరి సరదా తీర్చేస్తది" అన్న డైలాగ్ రాసి తనపై తనే సెటైర్ వేసుకున్న అమాయక చక్రవర్తి. బాణం బలంగా ముందుకు దూసుకెళ్లాలంటే వెనక్కే లాగాలి. సరిగ్గా అలాగే మండే సూర్యుడిలా పైకిలేచాడు... మళ్ళీ తెలివిగా సినిమాలు చేసి నిలబడ్డాడు. తనెంత మొండోడు అంటే ఒక్కసారి కమిటైతే తనమాట తనే వినడు. అందుకే ఎన్ని సమస్యలు రౌండప్ చేసి కన్ప్యూజ్ చేసినా తనేం చేయాలో తెలిసిన పిచ్చ క్లారిటీ వున్నోడు. అందుకే i love india i hate indians అంటూ మనకు పట్టిన బూజును దులపడానికి ఫిక్సైయ్యాడు. వినడు, పూరీ ఎవరి మాటా వినడు.
దర్శకుడంటే పూరిలా వుండాలి, మనం కూడా వెంటనే హైదరాబాద్ వెళ్లిపోయి దర్శకుడు అవ్వాలి అని పల్లెటూళ్లో వున్న కుర్రాళ్ళు సైతం కలలుగనే రేంజికి ఎదిగాడు. ప్రతి హీరో హీరోయిన్.. ఆ మాటకొస్తే ప్రతి ఆర్టిస్టు ఒక్కసారైనా పూరీ డైరెక్షన్ లో సినిమా చేయాలి అని టెంప్ట్ అయ్యేంతలా ఎదిగాడు.
చరిత్రలో గొప్పోళ్ళకి తప్పలేదు అవమానాలు, నీలాపనిందలు. సరిగ్గా అదే ఇప్పుడు మన పూరీ జగన్నాథ్ విషయంలో జరగబోతున్నట్లుంది! అయినా... ఏ రంగంలో లేవా బొక్కలు? ఇప్పుడు కోడై కూస్తున్న మీడియా వాళ్లేమైనా శ్రీరామచంద్రులా? పిల్లి పాలు తాగుతూ తననెవరూ చూడట్లేదని అనే సామెతలా వుంది మీడియా వాళ్ల యవ్వారం. కక్ష కట్టి మరీ రుద్దుతున్నారు. పూరీ అదనీ, ఇదనీ చివరికి ప్రపంచాన్నే ఏదో చేయబోతున్నాడన్న ఒక భ్రమని అపోహని క్రియేట్ చేస్తున్నారు. జనాలు ఇదే నిజమని నమ్మేంతగా tvల్లో పొద్దు పొడిచింది మొదలు పొద్దుపోయే దాకా పూరీ అండ్ కోని మర్డర్ చేసిన వాళ్ళుగా హైలెట్ చేసి చూపిస్తుండటంతో ఏ పాపం తెలియని వాళ్ల తల్లీతండ్రీ, భార్య పిల్లలు, అన్నాతమ్ముళ్లు, అక్కాచెల్లెళ్లూ, బంధుమిత్రులు ఎంతటి మనోవేదనని అనుభవిస్తున్నారో TRP రేటింగ్స్ కోసం కక్కుర్తి పడే మీడియాకి అది అనవసరం.
సమాజంలో ఎన్ని సమస్యలు లేవు! రైతుల ఆత్మహత్యలు, నిరుద్యోగం, సంక్షేమ పథకాల్లో అవకతవకలు, మార్కెట్లో దొరికే ప్రతి వస్తువు కల్తీ అవుతూ మనిషి జీవితాల్ని సర్వనాశనం చేసే కుట్రలు, భూకబ్జాలు... ఇలా ఎన్నిలేవని! కానీ మీడియా నైతిక విలువలకి పాతరేసి మరీ అబద్దాల్ని నిజాలుగా నమ్మించాలని కంకణం కట్టుకొని శక్తివంచన లేకుండా ఈ డ్రగ్స్ గురించే ప్రచారం చేస్తుంది. ఇది న్యాయమా? పూరీ కూడా మనలాగా సగటు మనిషే. తనకి బాధలుంటాయ్..సంతోషాలుంటాయ్. బాధల్ని తగ్గించు కోవాలని వాటి నుంచి బయట పడాలని ఎవరు మాత్రం కోరుకోరు. ఒత్తిడి తగ్గించుకునే క్రమంలో ఒక్కొక్కరు వాళ్లకు నచ్చినవి తీసుకుంటూ రిలాక్స్ అవుతుంటారు. అయినా, భూమి మీదున్న ప్రతోడు మనిషే, దేవుడు కాదు. మనిషన్నాక కొన్ని బలహీనతలు కూడా వుంటాయి. ఇందులో ఆశ్ఛర్యపోవాల్సింది ఏం లేదు. దెబ్బ తగిలినోడికే తెలుస్తుంది దాని నొప్పి. కొంతమందిని నమ్మినందుకు మోసం చేసి కింగ్ మేకర్ని అప్పులపాల్జేశారు. ఆ అప్పులు తీర్చడంకోసం కష్టపడి సంపాదించుకున్న కార్లూ, బంగ్లాలు అమ్ముకున్నోడికి ఇంకెంత నొప్పుండాలి. చీకటవ్వడమే ఆలస్యం, పబ్బుల్లో బార్లలో పీకలదాకా తాగి రోడ్ల మీద యాక్సిడెంట్స్ చేసే ఘనులు ఎంతమందో.. చిన్న చిన్న ఓటమిలకే, మనస్పర్థలకే సూసైడ్ లు చేసుకునే పిరికివాళ్ళ కన్నా పూరీ చేశాడని చెబుతున్నది నీచమైందా? కాదు. కాబోదు.
ఒకవేళ పూరీ మీడియాలో వస్తున్నట్లుగా డ్రగ్స్ తీసుకొని వుంటే అది తనకి నష్టం చేసేదే కానీ, పక్కోడికి ఇసుమంతైనా హాని కలిగించేది కాదు. విధి రాతను తప్పించుకోవటం ఎవరివల్లా కాదు. కాబట్టి మీడియా సంయమనం పాటించాలి. రాబోయే కాలమే నిజాల్ని బయటపెడుతుంది. అప్పటిదాకా ఇంకొకరి మనసు గాయం చేయొద్దు’ అంటూ తన లేఖలో పూరీ పేర్కొన్నారు.
కాగా, ఈ లేఖపై నెటిజన్ల నుంచి భిన్న విమర్శలు వచ్చాయి. ‘డ్రగ్స్ తీసుకోవడం తప్పు కాదా ఏంటీ.. రైతులు, శ్రామికులు మీ కంటే కష్ట పడుతున్నారు, వాళ్లంతా డ్రగ్స్ తీసుకోవడం లేదు కదా..’, ‘టాలీవుడ్ పెద్దల ఇళ్ళల్లో పుట్టలేని ఇడియట్, ప్రభుత్వ పెద్దలతో సంబంధాలు లేని పోకిరి, మీడియాను మేనేజ్ చేయలేని లోఫర్, చట్టాల మీద గౌరవం వున్న రోగ్ కాబట్టే ఏక్ నిరంజన్ అయ్యాడు..’, ‘నీ దగ్గరికి వచ్చేటప్పటికి.. నీతులు గుర్తుకు వస్తాయా పూరీ..జగన్నాథం’ అంటూ నెటిజన్లు విమర్శలు గుప్పించారు.
