: పెళ్లి చేసుకోకూడదనుకున్నాను.. కానీ నాన్న సర్దిచెప్పడంతో చేసుకున్నాను!: భూమా కూతురు మౌనిక
గుండెపోటుతో ఇటీవల మృతి చెందిన టీడీపీ ఎమ్మెల్యే భూమా నాగిరెడ్డి రాయలసీమలో మంచి నేతగా పేరు సంపాదించిన విషయం తెలిసిందే. నాగిరెడ్డి తన కుటుంబ సభ్యులపై కూడా ఎనలేని ప్రేమ చూపిస్తూ ఉండేవారు. ఈ సందర్భంగా భూమా నాగిరెడ్డి కూతురు మౌనిక ఒక న్యూస్ ఛానెల్ కు ఇచ్చిన ఇంటర్వ్యూలో మాట్లాడుతూ, ‘నాన్న ఎప్పటికీ నా హీరోనే. ఎక్కడ ఉన్నా, ఏం చేస్తున్నా.. నాన్న ఫోన్ చేస్తున్నారంటే అటెన్షన్ కు వచ్చేసే దానిని. ఆ భయం .. గౌరవం ఎప్పటికీ ఉంటాయి. నా తండ్రి నుంచి నేను చాలా నేర్చుకున్నాను. నాకు బాగా గుర్తు. చిన్నప్పుడు లారెన్స్ స్కూల్లో నన్ను వదిలిపెట్టడానికి నాన్న వచ్చినప్పుడు, నేను చాలా ఏడ్చాను. నేను, నాన్న షర్టు పట్టుకుని పీకితే బటన్స్ అన్నీ ఊడిపోయాయి...
ఫ్యాక్షన్ పరిస్థితుల కారణంగా నాన్న ప్రయాణిస్తున్న జీపులో ఎక్కాలన్నా భయపడే వాళ్లం. ఆళ్లగడ్డ నుంచి హైదరాబాద్ వెళ్లాలంటే.. ఒకే రూటులో వెళ్లే వాళ్లం కాదు .. ఓన్లీ నైట్ జర్నీస్ చేసే వాళ్లం.. ఒకే డ్రైవర్ ఉండే వాడు కాదు.. మారుస్తూ ఉండే వాళ్లం.. 'నీకు చదువులో స్టేట్ ర్యాంక్స్ రాకపోయినా ఫర్వాలేదు.. పాసయితే చాలు, నేను హ్యాపీగా ఉంటాను' అని నాన్న అనేవారు... నాన్న ఉన్నన్ని రోజులు మమ్మల్ని సంతోషపరచాలని చూశారు. రోడ్డు ప్రమాదంలో అమ్మ మృతి చెందిన తర్వాత నా మైండ్ లో నుంచి మ్యారేజ్ చేసుకోవాలనే విషయాన్నే తీసేశాను.
అయితే, నాన్న నాకు సర్దిచెప్పడంతో పెళ్లి చేసుకున్నాను. నాన్న ఆ రోజు చెెప్పిన మాటలు నా మైండ్ లో ఇంకా తిరుగుతూనే ఉన్నాయి. అమ్మ పోయిన తర్వాత నాన్న ఉండలేకపోయారని నా ఫీలింగ్.. అమ్మ వీడియోస్ చూపించమని నాన్న, పదే పదే మమ్మల్ని అడిగేవారు. అయితే, ఆ వీడియోస్ చూసి నాన్న మరింత కుంగిపోతాడనే భయంతో మేము ఆ వీడియోస్ పెట్టే వాళ్లం కాదు.. ఆ వీడియోస్ పెట్టకపోయినా, నాన్న మనసులో అమ్మ గురించిన ఆలోచనలే ఉంటాయని తెలుసు... అమ్మ, నేను సరదాగా కొట్టుకునే వాళ్లం. అప్పుడు, నాన్న నన్ను మరింత ఎంకరేజ్ చేసేవారు. మా తమ్ముడు కూడా మా నాన్నను సరదాగా ‘ఏం నాగిరెడ్డి?’ అనే వాడు.. నాన్న చెస్ బాగా ఆడేవారు. బాస్కెట్ బాల్, బ్యాడ్మింటన్ కూడా బాగా ఆడేవారు..’' అంటూ తన తల్లిదండ్రులతో తన అనుబంధాన్ని మౌనిక గుర్తుచేసుకున్నారు.
