Pushpa: అల్లు అర్జున్ 'పుష్ప' విడుద‌ల తేదీ ఖ‌రారు.. అల‌రిస్తోన్న కొత్త పోస్ట‌ర్!
- సుకుమార్‌, బన్నీ కాంబినేషన్‌లో 'పుష్ప'
- ఆగస్టు 13న థియేటర్లలో విడుద‌ల
- గొడ్డ‌లి ప‌ట్టుకుని ఉన్న బన్నీ పోస్ట‌ర్
సుకుమార్‌, అల్లు అర్జున్ కాంబినేషన్‌లో వస్తున్న 'పుష్ప' సినిమా విడుద‌ల తేదీని ఆ సినిమా బృందం ప్ర‌క‌టించింది. ఆగస్టు 13న 'పుష్ప' చిత్రాన్ని థియేటర్లలో విడుద‌ల చేస్తున్న‌ట్లు తెలిపింది. ఈ సంద‌ర్భంగా విడుద‌ల చేసిన మ‌రో పోస్ట‌ర్ అల‌రిస్తోంది.
గొడ్డ‌లి ప‌ట్టుకుని చుట్టూ త‌న బ‌లగంతో ఉన్న బన్నీ పోస్ట‌ర్ అద్భుతంగా ఉండ‌డంతో ఫ్యాన్స్ ఖుషీ అవుతున్నారు. ఈ సినిమాలో బన్నీ పుష్పరాజ్‌ అనే స్మగ్లర్‌గా క‌న‌ప‌డ‌నున్న విష‌యం తెలిసిందే. ఇందులో చిత్తూరు యాసలో హీరో డైలాగ్స్ ఉంటాయి.
ఎర్రచందనం స్మగ్లింగ్‌ నేపథ్యంలో రూపుదిద్దుకుంటోన్న ఈ సినిమాలో రష్మిక మందన్న హీరోయిన్‌గా నటిస్తోంది. దేవిశ్రీ ప్రసాద్‌ సంగీతం అందిస్తున్నాడు. ఈ సినిమాను నవీన్‌ ఎర్నేని, రవిశంకర్‌ నిర్మిస్తున్నారు.
కాగా, ఈ సినిమా విడుద‌ల తేదీని ప్ర‌క‌టించిన నేపథ్యంలో బన్నీ ట్విట్ట‌ర్‌లో స్పందించాడు. థియేటర్లలో ప్రేక్ష‌కులందరినీ కలవడం కోసం తాను ఎంతగానో ఎదురుచూస్తున్నానని చెప్పాడు. తాను, సుకుమార్‌, దేవిశ్రీప్రసాద్‌లు మరోసారి చరిత్రను పునరావృతం చేస్తామని అనుకుంటున్న‌ట్లు పేర్కొన్నాడు.
